Eminem yibasiye Trump amushinja kwirengagiza abaturage akaba imbata ya Twitter

Yanditswe na Dusabimana Aimable
Kuya 11 Ukwakira 2017 saa 09:46
Yasuwe :
0 0

Umuraperi Eminem yibasiye Perezida Donald Trump wa Leta Zunze Ubumwe za Amerika, agaruka cyane ku myitwarire ye irimo kwirengagiza ibabazo by’ingutu byugarije icyo gihugu cy’igihangange ahubwo umwanya munini akawumara acyocyorana kuri Twitter.

Marshall Bruce Mathers III [Eminem] ni umwe mu baraperi bubashywe muri Leta Zunze Ubumwe za Amerika, umuziki awumazemo imyaka 29 awukora mu buryo bw’umwuga. Anazwi nk’uyobora ikorwa ry’imishinga y’indirimbo ndetse akaba yaranagiye agaragara muri filime zitandukanye nk’iyitwa ’Da Hip Hop Switch’, ’The Wash’ na ’The Interview’ iheruka yaciye ibintu muri 2015.

Uyu muraperi wavukiye muri Detroit yafashe amashusho y’iminota ine n’amasegonda 34, yerekanywe mu birori bya BET Hip-Hop Awards ku wa Kabiri, tariki 10 Ukwakira 2017, yibasiyemo Perezida Trump abyutsa ibyamuvuzweho byo gushyigikira abo mu muryango wa KKK, gutesha agaciro Hillary Clinton no kwirengagiza amakuba mu gihugu ’akigira guteza serwakira kuri Twitter’.

Muri ayo mashusho uyu muhanzi yafatiye muri ’parking’ y’imodoka, anagereranya Trump n’umusaza ’rukukuri w’imyaka 94 urangwa n’imico y’ivanguraruhu’. Iyi ndirimbo ya Eminem ikozwe mu buryo bwa ’Freestyle’ yahise inyura ku zindi zose zigezweho kuri Youtube ifata umwanya wa mbere nyuma y’isaha imwe gusa yerekanywe kuri BET.

Eminem kuri ubu ufite imyaka 44 y’amavuko yagereranyije Trump n’umuntu udatekereza mu buryo ngo ahanganyemo na Koreya ya Ruguru, anavuga ko ashobora gukora ibidakwiye akaba yakwatsa umuriro agatsemba abantu akoresheje ibisasu by’ubumara.

Yagize ati "Dukwiye guha Obama icyubahiro akwiye kuko ibyo dufite ku butegetsi ubu ni nk’intwaro za kirimbuzi zishobora kwatsa umuriro akarimbura imbaga mu gihe ari mu mikino ye, none ngo ategereje ko ibintu bijya mu buryo, azurira indege ye azenguruke ikirere kugeza ibisasu bihagaritse urusaku."

Eminem yavuze ko Trump usanga ahugiye mu gukoresha Twitter atongana n’abantu igihugu kidafiteho inyungu na nke kandi hari ibibazo by’ingutu yagakwiye kuba yitaho. Ati "Usanga ashishikara cyane mu gutongana na NFL, tukaba ari byo turangarira aho kwegera Puerto Rico [yatewe n’ibiza] cyangwa imicungire y’imbunda."

Uyu muraperi bisanzwe bizwi ko atabona neza uko Trump yitwara n’uburyo ayoboramo yari amaze igihe yaramuhaye agahenge kuko yaherukaga kumwibasira ubwo yiyamamazaga mu Ukwakira 2016, akavuga ko abaturage ba Leta Zunze Ubumwe za Amerika bakwiye kumwitondera no gutinya ibyo yazakora aramutse atowe.

Eminem wakunzwe mu ndirimbo zirimo ’Stan’, ’Love the Way You Lie’, ’Not Afraid’, ’Rap God’ n’izindi, yaherukaga kumvikana mu itangazamakuru mu nkuru z’uburyo bushya asigaye agaragaramo bitandukanye na mbere kuko asigaye afite umusatsi n’ubwanwa bigaragara mu ibara ry’umukara, ibintu byatunguye benshi.

Uburyo bushya Eminem agaragaramo
Eminem amaze iminsi yambara imyenda iriho amagambo y'ibitutsi kuri Trump
Eminem yaherukaga kuvuga nabi Trump ataratorerwa kuyobora Leta Zunze Ubumwe za Amerika

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza