Kwamamaza

Ibihugu bya Afurika ICC imaze gukoramo iperereza n’icyayihagurukije

Yanditswe kuya 23-10-2016 saa 11:11' na Ntakirutimana Deus


Ibihugu byinshi byo ku mugabane wa Afurika bigengwa n’amasezerano ya Roma yashyizeho Urukiko Mpuzamahanga Mpanabyaha (ICC), bikomeje kugaragaza ubushake bwo kwitandukanya narwo, birushija kwigiriza nkana ku banyafurika.

Ukurikije ibyo ibi bihugu bivuga ndetse n’imibare igaragaza ibihugu uru rukiko rumaze gukoreramo iperereza ku byaha binyuranye byiganjemo iby’intambara, ibyibasiye inyokomuntu n’ibindi, ushobora kudashidikanya ku bivugwa nabyo.

Jeune Afrique igaragaza ko kuva uru rukiko rwashyirwaho mu 2002, rumaze gukora iperereza ku byaha binyuranye mu bihugu icyenda birimo umunani byo ku mugabane wa Afurika.

Muri iyi nkuru bagaragaza ko urwo rukiko rurangwa n’ivanguraruhu ryo gukurikirana ibihugu bya Afurika, ku buryo ibihugu bimwe na bimwe biri mu nzira zo kwivana mu masezerano ashyiraho urwo rukiko.

U Burundi bwarangije gutorera kwivana mu masezerano arushyiraho, ndetse na Afurika y’Epfo yatangiye guca amarenga, ibyo bihugu byombi bishinja ICC gufata imyanzuro iganisha kuri politiki kurusha ko ari mu kubahiriza amatageko.

RDC

Muri iki gihugu, uwari umuyobozi w’inyeshyamba zavugaga ko ziharanira ubwigenge bwa Congo, Bosco Ntaganda, yarezwe ibyaha byibasiye inyokomuntu ndetse n’iby’intambara, mu 2002 na 2003 mu Ntara ya Ituri. Urubanza rwe rwatangiye kuburanishwa n’uru rukiko muri Nzeri 2015.

Si we gusa kuko Thomas Lubanga wari umuyobozi w’inyeshyamba muri icyo gihugu, na we yakatiwe imyaka 14 y’igifungo mu 2012. Iki gihano yahawe cyanashimangiwe n’urukiko rw’ubujurire, nyuma yo guhamwa n’ibyaha byo gushora abana mu ntambara hagati ya 2002 na 2003.

Abo biyongera kuri Mathieu Ngudjolo Chui na we wahoze ari umuyobozi w’umutwe w’inyeshyamba muri Congo wagizwe umwere n’urwo rukiko mu Ukuboza 2012, aho yari akurikiranywemo kugaba ibitero ahitwa i Bogoro muri 2003. Icyo cyaha cyahamijwe Germain Katanga, na we wahoze ari umuyobozi w’umutwe w’inyeshyamba, wakatiwe imyaka 12 y’igifungo tariki ya 23 Gicurasi 2014.

Sylvestre Mudacumura na we yashyiriweho impapuro zo kumuta muri yombi na ICC, kubera ibyaha akekwaho gukorera muri Congo, nk’umuyobozi w’inyeshyamba zirwanya leta y’u Rwanda,FDLR. Ibyo byaha akekwaho kubikorera mu Ntara ya Kivu hagati ya 2009 na 2010.

Uganda

Muri 2005, ICC yasohoye impapuro zo guta muri yombi Joseph Konny ndetse n’abandi bayobozi b’umutwe witwara gisirikare urwanya leta ya Uganda (Lord’s Resistance Army ,LRA) bashinjwa gushora abana mu ntambara.

Umwe muri bo Dominic Ongwen yoherejwe kuburanira muri urwo rukiko, urubanza rwe ruteganyijwe gutangira tariki ya 6 Ukuboza 2016.

Sudani

Perezida wa Sudani Omar Al Bashir ari mu bantu batanu bashyiriweho inyandiko zo kubata muri yombi, bashakishwa n’urwo rukiko ngo bakurikiranweho ibyaha bakekwaho gukorera mu Ntara ya Darfur, mu 2003 igahitana abasaga ibihumbi 300 nkuko Loni ibitangaza.

Perezida Bashir yashyiriweho izo mpapuro hagati y’umwaka wa 2009 n’uwa 2010, kubera ibyaha by’intambara, ibyibasiye inyokomuntu n’ibya Jenoside akekwaho.

Kugeza ubu aratembera muri Afurika nta bwoba afite bwo gutabwa muri yombi.
Gusa urwo rukiko rwashinje Afurika y’Epfo kwanga guta muri yombi Perezida Bashir, ubwo yari muri icyo gihugu muri 2015.

Kenya

Ku bw’ibimenyetso bidahagije, Visi Perezida wa Kenya, William Ruto yarokotse gukurikiranwa na ICC ndetse n’Umunyamakuru Joshua Arap Sang, ku byaha bari bakurikiranyweho byibasiye inyokomuntu bakekwaho gukora mu mvururu zakurikiye amatora yo muri Kenya yabaye hagati 2007. Urubanza rwabo rwari rwatangiye muri Nzeri 2013.

Urwo rukiko kandi rwagombaga gukurikirana Perezida Uhuru Kenyatta, ariko Umushinjacyaha Mukuru wa ICC Bensouda yaje gutangaza ko na we atazakurikiranwa kubera ibura ry’ibimenyetso ku byaha yakekwagaho.

Côte d’Ivoire

Laurent Gbagbo, wahoze ayobora Côte d’Ivoire yagejejwe imbere y’uru rukiko, aho afungiye guhera tariki ya 30 Ugushyingo 2011. Areganwa kandi na Charles Blé Goudé wahoze ari umuyobozi w’inyeshyamba muri icyo gihugu guhera muri Werurwe 2014.

Baregwa ibyaha byibasiye inyokomuntu bashinjwa gukora mu mvururu zakurikiye amatora y’Umukuru w’Igihugu, zatangiye mu Ukuboza 2010 na Mata 2011, urubanza rwe rwatangiye kuburanishwa tariki ya 28 Mutarama 2016.

Umuryango wa Gbagbo ntiwaje koroherwa, kuko n’umugore we Simone Gbagbo na we yaje gushyirirwaho impapuro zo kumuta muri yombi na ICC, akatirwa gufungwa imyaka 20 n’urukiko rwo muri Côte d’Ivoire, ahamijwe ibyaha byo kubangamira umudendezo w’igihugu.

Libya

Urwo rukiko rwatanze impapuro zo gufata umuhungu w’uwahoze ari Perezida w’icyo gihugu, Mouammar Kadhafi. Seif al-Islam akurikiranyweho ibyaha byibasiye inyokomuntu, ashinjwa kuba yarakoze mu gohe habaga mvururu zagejeje ku musozo ubutegetsi bwa se waje no kwicwa muri 2011.

Centrafrique

Ibyaha byakorewe muri icyo gihugu byakurikiranywe ku Munye-Congo, Jean-Pierre Bemba, wari Visi Perezida, akaza gukatirwa na ICC imyaka 18 y’igifungo muri Kamena 2016, ahamijwe ibyaha by’intambara ndetse n’ibyibasiye inyokomuntu byakozwe n’ingabo ze muri Repubulika ya Centrafrique mu Ukwakira 2002 kugeza muri Werurwe 2003, aho yari yagiye gufasha ingabo za Perezida Ange-Félix Patassé zari zihanganye n’inyeshyamba za François Bozizé.

Mali

Umwe mu bagize inyeshyamba z’Aba Touareg, Ahmad Al Faqi Al Mahdi, yakatiwe imyaka icyenda y’igifungo muri Nzeri 2016 ahamijwe ibyaha byo gusenya inyubako z’urusengero ndetse n’inyubako ndangamurage ziherereye i Tombouctou. Urubanza rwe rwabaye urwa mbere rw’umuntu ushinjwa ibikorwa by’iterabwoba imbere y’uru rukiko.

Uretse ibi bihugu, ICC yatangiye iperereza ry’ibanze mu bihugu bitandukanye byo muri Afurika birimo Gabon, Guinée, u Burundi na Nigeri; byose biganisha ku gukora iperereza ryimbitse ku byaha rukekamo.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved