Facebook yaciwe miliyoni 110 z’amayero ku manyanga yakoze igura WhatsApp

Yanditswe na Cyprien Niyomwungeri
Kuya 18 Gicurasi 2017 saa 01:40
Yasuwe :
0 0

Komisiyo Ngenzuramikorere y’Umuryango w’Ubumwe bw’u Burayi (EU), kuri uyu wa Kane yaciye Facebook akayabo ka miliyoni 11o z’amayero, kubera amakuru y’ibinyoma yatanze ubwo yaguraga urubuga nkoranyambaga ruzwi cyane mu guhuza abakoresha telefoni zigezweho, WhatsApp mu 2014.

Facebook igura Whatsapp miliyari 19 z’amadolari, yabwiye iyi Komisiyo ko itazahuza konti z’izo mbuga ariko nyuma y’imyaka ibiri biza kugaragara ko ibyo bintu yabikoze

Mu isuzuma Komisiyo yakoze yasanze ko abakozi ba Facebook mu 2014 bari bazi ko bishoboka guhuza nimero y’ukoresha WhatsApp n’imyirondoro y’ukoresha Facebook. Ibi bikaba bitandukanye n’ibyo Facebook yari yatangaje ko bitazashoboka.

Facebook yemeye ko aya makosa yakozwe mu gushyira hamwe amakuru mu 2014 kandi bitakozwe ku bushake.

Guhanwa kwa Facebook ngo ni ukugira ngo bibe ikimenyetso cy’uko ibigo byose by’ubucuruzi bigomba gukurikiza amategeko agenga EU. Iki gihano ntabwo gihungabanya igurwa rya WhatsApp no gukora iperereza ku kurinda amakuru y’abakoresha ziriya mbuga.

Reuters yanditse ko Komisiyo yagombaga guhanisha Facebook nibura guhera kuri 1% by’ibyo yinjije byagombaga kungana na miliyoni 276 z’amadolari ugereranyije n’ibyinjiye mu 2016. Gusa ibi ntibyakurikijwe kuko Facebook yemeye amakosa kandi igatangira kugira icyo ibikoraho.

Ibi bihano birakurikira iby’ikigo kibungabunga amakuru y’abantu cyo mu Bufaransa, muri iki cyumweru cyahanishije Facebook ibihumbi 150 by’amayero kubwo kutarinda amakuru y’abakiliya kugeza ubwo agerwaho n’abamamaza.

Mu cyumweru gishize Ikigo Ngenzuramikorere cyo mu Butaliyani cyahanishije WhatsApp akayabo ka miliyoni eshatu z’amayero, kubwo guhatira abayikoresha kwemera gusangira amakuru yabo bwite na Facebook.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza