FBI ntiteganya guhagarika iperereza ku ruhare rw’u Burusiya mu matora ya Amerika

Yanditswe na Mukaneza M.Ange
Kuya 12 Gicurasi 2017 saa 08:25
Yasuwe :
0 0

Nyuma y’iyirukanwa rya James Comey wari Umuyobozi Mukuru w’Ibiro bishinzwe Iperereza, FBI, Andrew McCabe uri kuyobora by’agateganyo, yatangaje ko adateze guhagarika iperereza ku ruhare rw’u Burusiya mu matora ya Perezida wa Leta Zunze Ubumwe za Amerika.

Ku wa kabiri nibwo inkuru yasakaye ko Perezida Donald Trump, yirukanye Comey wari Umuyobozi Mukuru wa FBI.

Ubwo ku itariki ya 11 Gicurasi 2017, McCabe yakirwagana Komisiyo ya Sena ishinzwe ibijyanye n’ubutasi, yagarutse ku ngingo bigaragara ko zidashobora gushimisha Trump by’umwihariko ibijyanye no gukomeza iperereza ku ruhare u Burusiya bwagize mu bikorwa bye byo kwiyamamariza kuba Perezida.

Nk’uko RFI dukesha iyi nkuru yabyanditse, ntiyahwemye kugaragaza ko yubaha cyane Comey wari umuyobozi we kandi ko amushimira ku bw’akazi gakomeye yakoraga.

Yanagaragaje ko hari ibimenyetso bifatika bigaragaza ko abantu ba hafi ya Trump bakoranye n’u Burusiya, kandi ko FBI idafite gahunda yo guhagarika iperereza.

Ati “ Akazi k’abakozi ba FBI karacyakomeje, impinduka izo arizo zose, ibyemezo ibyo aribyo byose byafatwa. Nta gahunda ihari yo guhagarika iperereza ryacu kugeza ubu. Kugira ngo mbisobanure neza, ntabwo ushobora kubuza abagabo n’abagore ba FBI gukora ibikwiye, aribyo kurinda Abanyamerika no kurengera Itegeko Nshinga.”

McCabe kandi yavuze ko nta gitutu kirashyirwa kuri FBI, ko igihe hazaba hari impamvu za politiki zivanze mu kazi kabo azabimenyesha Sena.

Yanashimangiye ko badateganya kujya baha ibiro bya perezida, White House raporo igaragaza aho iperereza rigeze.

Hari bamwe babona kwirukanwa kwa Comey bifitanye isano n’iperereza ku ruhare rw’u Burusiya mu ntsinzi ya Trump, dore ko yari aherutse gutangaza ko hari ibindi bimenyetso simusiga.

Ibi ariko Trump avuga ko nta kuri kurimo kuko mu kiganiro yagiranye na NBC yatangaje ko ari we ku giti cye wafashe icyemezo cyo kwirukana Comey kubera ko atakoraga akazi ke neza.

Trump kandi yavuze ko ubwo yabazaga Comey niba ari gukorwaho iperereza, undi yamuhakaniye akamubwira ko nta n’umwe uri kumukurikirana.

U Burusiya bushinjwa kwivanga mu matora ya Amerika no gushyira hanze amabanga ya Komite y’ishyaka ry’Aba- démocrate, igikorwa kivugwaho kuba aricyo cyatumye Hillary Clinton atsindwa amatora.

McCabe yavuze ko FBI itazareka iperereza ku ruhare rw'u Burusiya mu matora

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza