Kwamamaza

Fidel Castro wigeze kuba Perezida wa Cuba yapfuye

Yanditswe kuya 26-11-2016 saa 08:06' na Philbert Hagengimana


Fidel Castro, wabaye Perezida wa Cuba imyaka 32, akaba yarafatwaga nk’umwanzi wa Leta zunze ubumwe za Amerika, yapfuye ku myaka 90.

Mu gitondo cy’uyu wa 26 Ugushyingo 2016, ni bwo inkuru yabaye kimomo ko Fidel Castro yapfuye, icyakora nta byinshi byari byatangazwa ku rupfu rw’uwo mugabo ufatwa nk’intwari muri Cuba, akaba Umutegetsi w’igitugu ku bataravugaga rumwe na we.

Fidel Castro yabaye Perezida wa Cuba kuva ku itariki ya 2 Ukuboza 1976 kugeza ku itariki ya 24 Gashyantare 2008, ahita asigira ubutegetsi murumuna we Raúl Castro.

Muri Mata uyu mwaka, Fidel Castro yavuze ijambo ryasaga n’irica amarenga y’urupfu rwe, aho yagize ati “Bidatinze nduzuza imyaka 90, ibintu ntigeze ntekereza na rimwe. Bidatinze ndaba nk’abandi, ariko twese igihe cyacu kizagera.”

Nyuma y’urupfu rwa Fidel Castro, Raul Castro yatangaje icyunamo cy’iminsi icyenda (9) mu gihugu hose, mu rwego rwo guha icyubahiro uwo mukambwe wafatwaga nk’umubyeyi w’impinduramatwara.

Amwe mu matariki y’ingenzi yaranze ubuzima bwe

Kuwa 13 Kanama 1926: Fidel Castro yavukiye mu Majyepfo y’Uburasirazuba bw’Intara ya Oriente muri Cuba;

1953: Yarafunzwe nyuma yo kugaba igitero kigamije guhirika ku butegetsi Perezida Fulgencio Batista ariko bikaza gupfuba, aza gufungurwa ku mbabazi za Perezida mu 1955.

Mu 1956 we na Che Guevara batangije bundi bushya urugamba rwo gukuraho Guverinoma, ndetse baza kurutsinda maze mu 1959 Fidel Castro arahirira kuba Ministiri w’Intebe.

Mu 1960 ingabo za Brigade 2506 zari zigizwe n’Abanya-Cuba bari bari mu buhungiro, ku nkunga y’ibiro by’ubutasi by’Abanyamerika (CIA), zashakatse gukuraho Guverinoma ya Fidel Castro. Izo ngabo zari zagabye igitero ziturutse muri Guatemala na Nicaragua, iza Cuba zari ziyobowe na Fidel Castro ubwe, zatsinze urwo rugamba mu minsi itatu gusa.

Aha hakaba ari na ho hatumye urwango hagati ya Cuba na USA rufata indi ntera.
Mu 1962, Fidel Castro yumvikanye n’Ihuriro ry’ibihugu bigendera ku matwara ya gi- socialist ku kuzana ibisasu bya kirimbuzi muri Cuba, byongera amahari hagati y’icyo gihugu na USA.

Mu 1976, Fidel Castro Inteko Ishinga Amategeko yamutoreye kuba Perezida wa Cuba, maze mu 1992 aza kubasha kumvikana na USA, banasinyana amasezerano arebana n’impunzi z’Abanya-Cuba.

Mu 2008, ku mpamvu z’ibibazo by’ubuzima, Fidel Castro yarekuye ubutegetsi yari amazeho imyaka 32 ari Perezida, abusigira murumuna we Raul Castro.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved