Habonetse inyandiko ishobora gufungura amarembo yo kweguzwa kwa Trump bidatinze

Yanditswe na Bukuru JC
Kuya 17 Gicurasi 2017 saa 03:29
Yasuwe :
0 0

Perezida Trump ashobora kweguzwa mu gihe inyandiko yasohowe na James Comey wari Umuyobozi Mukuru w’Ibiro bishinzwe Iperereza (FBI), aheruka kwirukana, imubuza gukurikirana Michael Flynn wahoze ari umujyanama wa Trump mu by’umutekano ku ruhare bivugwa ko yagize mu kumena amabanga y’igihugu ayabwira ambasaderi w’u Burusiya, yaba ari impamo.

Perezida Trump ubwo yahuraga na Comey kuya 14 Gashyantare, yamusabye ko yahagarika gukurikirana Michael Flynn wakorwagaho iperereza ku ruhare yagize mu matora y’umukuru w’igihugu yo mu 2016 muri Amerika.

Iyi nyandiko igira iti “Ndizera ko ushobora kureka gukurikirana Flynn. Ni umuntu mwiza, ndumva ibyo aregwa wabyirengagiza.”

Iyi nyandiko ishobora kuba gihamya ko Perezida Trump yagerageje kwica iperereza ryakorwaga ku bari bamushyigikiye n’uburyo bakoranye na Leta y’u Burusiya.

New York Times itangaza ko iyi nyandiko igaragaza ibyari ku murongo w’ibyo baganiriyeho Comey yayanditse, hashize umunsi umwe Flynn ahita yegura.

Mu gihe byaba ari impamo ko Perezida Trump yashatse kwitambika inshingano z’ubutabera, ni icyaha gishobora gutuma hatangizwa ubusabe bwo kumweguza, nk’uko byatangajwe na Senateri Angus Stanley King Jr. Ati “ Bishobora guhita bikorwa.”

Ibiro by’Umukuru w’Igihugu byahise bitera utwatsi inyandiko zasohowe na Comey bivuga ko nta shingiro zifite ndetse zitanga amakuru atari yo ku kiganiro cyahuje impande zombi.

Itangazo ryasohowe rigira riti “Perezida (Trump) akunda kuvuga ko Michael Flynn ari umuntu wakoreye igihugu akanakirinda, ntabwo yigeze asaba Comey cyangwa undi wese guhagarika iperereza ryakorwaga ku bantu batandukanye barimo na Flynn.”

Rikomeza rigira riti “Perezida yubaha ibigo byose bya leta bikora mu by’amategeko ndetse n’iperereza. Aya makuru nta kuri agaragaza ku byaganiriwe hagati ya Perezida na Comey.”

Perezida Trump wakunze guhakana uruhare rw’u Burusiya mu matora avuga ko ari ‘inkuru zidafite gihamya’, mu kiganiro aheruka kugirana na NBC, yemeye ko iperereza Comey yakoraga ku Burusiya riri mu byatumye yirukanwa.

Yemera ko yabajije Comey ubugira gatatu niba atari gukorwaho iperereza, aramuhakanira. Abashyigikiye Comey bamaganye icyo gitekerezo bavuga ko atashoboraga kubikora gutyo.

Ubwo yabazwaga ku mpamvu yirukanye Comey, Trump yasubije ko ari uko atakoraga akazi ke neza, ariko yanga kugira icyo avuga ku kibazo cyamubazaga impamvu ahisemo kumwirukana mu gihe FBI yari iherutse kuvuga ko yabonye ibimenyetso bishya mu iperereza ku kuba u Burusiya bwarivanze mu matora ya Amerika.

Perezida w’u Burusiya, Vladimir Putin, yatangaje ko yiteguye gutanga inyandiko igaragaza ibiganiro mugenzi we wa Amerika, Donald Trump, bivugwa ko yamennye amabanga y’urwego rw’ubutasi, yagiranye na Minisitiri w’Ububanyi n’Amahanga, Sergey Lavrov.

James Comey (ibumoso) wari Umuyobozi Mukuru w’Ibiro bishinzwe Iperereza (FBI) yirukanywe na Perezida Trump

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza