Hagiye gukinwa filime ku bakinnyi b’Abanya-Thaïlande bigeze guhera mu buvumo

Yanditswe na Emma-Marie Umurerwa
Kuya 2 Gicurasi 2019 saa 12:41
Yasuwe :
0 0

Ikigo gikora mu bijyanye n’itangazamakuru cya Netflix cyabonye uburenganzira bwo gukora uruhererekane rugufi rwa filime ku irokorwa ry’abahungu 12 n’umutoza wabo w’umupira w’amaguru, bakuwe mu buvumo mu majyaruguru y’igihugu cya Thaïlande mu mwaka ushize wa 2018.

Muri Nyakanga 2018 nibwo abakinnyi 12 b’ikipe y’ingimbi y’umupira w’amaguru muri Thaïlande yitwa Wild Boars, baburiwe irengero baza kuboneka mu buvumo buri mu Ntara ya Chiang Rai ari bazima.

Ikipe ya Wild Boars yagarutsweho cyane mu bitangazamakuru bitandukanye ku Isi, nyuma yuko barohama mu buvumo bwari bwibasiwe n’imyuzure kubera imvura nyinshi, bakabumaramo ibyumweru birenga bibiri.

Bose baburokowemo amahoro nyuma y’ibikorwa by’ubutabazi byakozwe n’impuguke 90 zazobereye mu koga zibira zaturutse mu bihugu bitandukanye.

Inkuru dukesha The Guardian iravuga ko ibyabaye kuri izi ngimbi bigiye gukinwamo filime y’uruhererekane na Netflix.

Urwo ruhererekane rwa za filime ruzayoborwa na Jon M. Chu wanayoboye filime Crazy Rich Asians - afatanyije na Nattawut "Baz" Poonpiriya.

Erika North wo mu kigo Netflix yagize ati “Iyi nkuru ihuza intero z’ibintu byinshi cyane byo muri icyo gihugu kandi binahuriweho n’abandi bantu ku isi, bihuza abantu bo mu byiciro bitandukanye ku isi. Netflix ifite isoko rinini cyane muri Thaïlande, kandi dufite amashyushyu yo gutangariza amahanga iyi nkuru itanga urugero rwiza kandi inakora ku mbamutima z’abandi bantu ku isi.”

Iyi kipe yo muri Thaïlande y’abakinnyi bafite hagati y’imyaka 11 na 16 y’amavuko n’’umutoza wabo w’imyaka 25 y’amavuko, barohamye ku itariki ya 23 y’ukwezi kwa Kamena 2018, ubwo basuraga ubuvumo buri i Chiang Rai mu majyaruguru y’igihugu, amazi y’imvura nyinshi agahita abuteramo imyuzure bakabura inzira banyuzemo binjira.

Kugeza ubu, nkuko bitangazwa n’igitangazamakuru Hollywood Reporter, hamaze kwandikwa ibitabo bibiri ku irokorwa ryabo, mu gihe hari indi filime yitwa The Cave ivuga ku nkuru yabo yarangije gufatwa amashusho mu Ukuboza 2018.

Iyi filime yakozwe n’umuyobozi wa za filime witwa Tom Waller, ufite ubwenegihugu bw’u Bwongereza n’ubwa Thaïlande.

Inkuru y'aba bakinnyi bigeze guhera mu buvumo bagatabarwa igiye gukinwamo filime y'uruhererekane
Hagiye gukinwa filime mbarankuru ivuga ku nkuru y'aba bakinnyi bigeze guhera mu buvumo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza