Hahishuwe ko u Burusiya bwashinze ikigo cyangishaga abaturage Obama na H. Clinton

Yanditswe na Herve Ugirumukunda
Kuya 19 Ukwakira 2017 saa 01:28
Yasuwe :
0 0

Mu matora ya Perezida wa Leta Zunze Ubumwe za Amerika yabaye mu mwaka ushize, Donald Trump yaratunguranye atsinda Hillary Clinton, bikekwa ko u Burusiya bwaba bwarinjiriye ikoranabuhanga bukamwibira amajwi.

Kugeza ubu inzego z’ubutasi za USA ziracyashakisha ukuri kuri icyo kibazo ariko muri iki cyumweru bwo haje kuvumburwa ko u Burusiya bwari bwarashinze ikigo kitwa ‘Internet Research Agency’ cyari gishinzwe gukoresha imbuga nkoranyambaga cyane cyane Facebook kigamije kugumura abaturage ba USA ngo bange ubutegetsi bwa Barack Obama.

Business Insider yanditse ko umwe mu bahoze bakorera icyo kigo uzwi ku izina rya Max yatanze ubuhamya bw’uko bakoraga, asobanura ko bari bafite amashami ane arimo Ishami ry’u Burusiya, iryo mu mahanga, irya Facebook n’iryo guteza umwiryane.

Ishami ryo mu Burusiya ryari rigizwe n’abakozi bahimbaga inkuta za Facebook zitabaho bakazishyiraho ubutumwa bwo gushyigikira Donald Trump n’amakuru y’ibihuha amuvuga neza, akanenga Hillary Clinton.

Iryo mu mahanga ryakoreshaga abakozi bazi politiki ya USA bakivanga mu biganiro mpaka byo kuri Facebook bashyigikira Trump, abandi bagatangaza ibiganiro byo gushotora abari bashyigikiye Hillary na Obama.

Ibyo byose bwakorwaga mu gihe Trump na Hillary biyamamazaga habura iminsi mike ngo amatora yo mu Gushyingo 2016 abe.

Max ati “Akazi kacu kari ako guteranya Abanyamerika na guverinoma yabo, gushoza imvururu n’umwuka mubi mu baturage.”

Yongeyeho ko bari bafite amategeko akarishye yo kwiyoberanya nk’abaturage ba USA kandi ntibashoboraga kuvuga ko bashyigikiye u Burusiya.

Ati “Byari bigoranye, ntabwo kwari ugupfa kuvuga ngo ‘Obama ni inkende’ cyangwa ‘Putin arakomeye’, bari no kuguhana uramutse ukoresheje ubwo buryo bw’icengezamatwara bushaje.”

Ahubwo bo bagumuraga abaturage badashyigikiye gahunda za Leta ya Obama ari nazo Hillary Clinton yari gukomeza, bakanenga nk’ibintu byo gushyigikira ubutinganyi, kuvanamo inda n’ibindi.

Max yakomeje agira ati “Intego yacu ntiyari iyo guteranya Abanyamerika n’u Burusiya, yari iyo guteranya Abanyamerika n’ubuyobozi bwariho, bakivumbura, bigatuma Obama yangwa.”

Ishami ryo guteza umwiryane ryari rifite akazi kihariye ko gutangaza inkuru mpimbano zitera Abanyaburayi n’Abanyamerika gusubiranamo.

Ubu Facebook iri gukorwaho iperereza ngo harebwe ingano y’ibikorwa Abarusiya bayikoreyeho bagumura abaturage ba USA.

Kuri ubu uru rubuga rweretse inteko amatangazo yo kwamamaza y’Abarusiya asaga 3000 yose yaguzwe mu gihe cy’amatora.

Iperereza ryagaragaje ko ibikorwa by’icengezamatwara by’u Burusiya byakorerwaga ku mbuga nkoranyambaga za Facebook, Instagram na Twitter byageraga ku bantu miliyoni 30 buri cyumweru.

Kuri ibyo bikorwa hiyongeraho ko Abarusiya biyoberanyije bakoreshaga izo mbuga batumira Abanyamerika mu bikorwa by’imyigaragambyo bakamagana gahunda za Hillary Clinton bakabyitabira ku bwinshi.

Byanatahuwe ko impirimbanyi z’Abanyamerika zisaga 100 zagiye zitegura imyigaragambyo zigahabwa amafaranga ariko ntizimenye ko ziri gukorera Abarusiya.

Perezida w'u Burusiya, Vladimir Putin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza