Haracyari ababyeyi bafungirana abana mu nzu kubera ko bavukanye ubumuga

Yanditswe na Kanamugire Emmanuel
Kuya 29 Nyakanga 2016 saa 08:16
Yasuwe :
0 0

Bamwe mu babyeyi bafite ababa bavukanye ubumuga babafungirana mu nzu babita ibigoryi, bakanabahimba amazina atandukanye yumvikanisha ko atari abantu mu gihe iyo bitaweho bagaragaza ko na bo hari ibyo bashoboye kimwe n’abadafite ubumuga.

Iyi myumvire y’ababyeyi bamwe na bamwe igira ingaruka ku bana bafite ubumuga bakabuzwa kujya mu mashuri nk’abandi bitewe no kudahabwa ibyo bakeneye byabunganira mu ntege nke baterwa na bwo.

Leta y’u Rwanda yashyizeho ingamba nyinshi zo kurengera abana bafite ubumuga nyamara urugendo ruracyari rurerure kuko hari abagifatwa nk’aho atari abana nk’abandi.

Bamwe mu bavukanye indwara yo mu mutwe ituma uyirwaye adindira mu mikurire ‘autisme’ bagira imyitwarire itandukanye n’iy’abandi, bigatuma rimwe na rimwe bahabwa akato n’ababyeyi babo ndetse n’umuryango muri rusange.

Misingo Marie,umubyeyi urera umwana wavukanye iyi ndwara yagize ati “Hari ababyeyi babona umwana afite iki kibazo bakavuga ko ari abadayimoni arwaye, bakamusengera aho kumujyana kwa muganga. Hari n’abo usanga bahisha abana mu nzu ntibabe babageza aho abandi bari ahubwo bakabita ibigoryi, ibicucu n’andi mazina yumvikanisha ko atari abantu ahubwo ari ibintu.”

Mutabazi Fabien na we ni umubyeyi ufite umwana wavukanye ikibazo cya ‘Autisme’ avuga ko yagowe cyane no kubyakira. Ati “Ntibyoroshye kurera umwana ufite ikibazo cyo kudindira mu mikurire, ni umwana usaba kwitabwaho cyane. Abenshi usanga babahisha mu nzu, ntibabe babajyana aho abantu bari.”

Umuyobozi w’Ikigo ‘Autisme Rwanda’ giherereye mu Mujyi wa Kigali, Rosine Duquesne Kamagaju, avuga ko nta mubyeyi ukwiye guterwa ipfunwe n’uko yabyaye umwana ufite iki kibazo.

Yagize ati “Ni indwara ivukanwa ikigaragaza umwana atangiye kugira amezi umunani, kuko aba atagerageza kuvuga nk’uko bigenda ku bandi bana batayifite. Bisaba ko umwana ufite icyo kibazo yitabwaho by’umwihariko.”

Akomeza avuga iyi ndwara nubwo itazwi cyane, iki kigo kimaze kwakira abana batandukanye bayifite mu gihe cy’imyaka ibiri bakaba bamaze kwakira abarenga 100, barimo 25 bitabwaho umunsi ku munsi, ndetse n’ababyeyi babo bagahugurwa bakanagirwa inama z’uburyo bakwiye kubitaho butandukanye n’uburyo bitaho abandi bana badafite iki kibazo.

Bamwe mu babyeyi bafite abana bafite indwara ya "Autisme"

[email protected]


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza