Kwamamaza

Hillary Clinton amaze kurusha Donald Trump hafi miliyoni ebyiri z’abaturage bamutoye

Yanditswe kuya 24-11-2016 saa 17:40' na Rabbi Malo Umucunguzi


Umu-democrate Hillary Clinton, yongeye kugarukwaho mu itangazamakuru kubera amatora, aho ibarura riri gukorwa hitawe ku ijwi rya buri muturage watoye, ari kuza imbere ya Donald Trump wamaze kwemezwa nka Perezida.

Clinton yatsinzwe na Trump muri ‘Electoral College’, ndetse ugukomeza kuzamuka kw’amajwi y’abaturage ntacyo bishobora guhindura ku mukandida ugomba guhabwa ibiro i Washington.

Gusa bamwe mu barwanashyaka ba Clinton batangiye kuvuga ko iki kinyuranyo ari kurusha Trump gitera inkeke hibazwa niba amajwi yaba yarabaruwe nk’uko bikwiye.

Kugeza kuri uyu wa Gatatu nimugoroba, Clinton yari ari imbere yashyizemo ikinyuranyo cya miliyoni imwe n’ibihumbi 820, aho yari afite 63 964 956 mu gihe Trump we yari agifite 62 139 188.

Ugutsindwa kwa Clinton mu matora yo kuwa 8 Ukwakira, gufatwa nk’ukwaturutse kuri leta yatsinzwemo na Trump ku kinyuranyo gito cyane muri Michigan, Pennsylvania na Wisconsin, ariko ubu amajwi Clinton ari gukura mu baturage arakomeza kuzamuka.

Gusa itsinda ry’abahanga rikomeje gusaba Clinton kutemera ko ibyavuye mu matora ari ntakuka agasaba ko amajwi yongera kubarurwa, aho bakeka ko habaye ibikorwa by’uburiganya cyangwa ikoranabuhanga ryatorerwagamo rikaba ryarinjiwemo n’abajura, nubwo Clinton atarabyihutira kuko hari ubwo ntacyo byahindura kandi bigatwara amafaranga menshi.

Ikinyamakuru Huffington Post kivuga ko mu gihe amajwi yaba yongeye kubarurwa, ho byaba bishoboka ko ibyavuye mu matora bihinduka, noneho bigahengamira kwa Hillary Clinton.

Muri leta ya Wisconsin hamwe mu ho Trump yatsinze Clinton ku majwi make cyane, Perezida w’ishyaka rirengera ibidukikije nawe wari umwe mu bakandida, Jill Stein, yavuze ko yamaze gukusanya ubushobozi buhagije bwakoreshwa mu kongera kubarura amajwi, aho yavuze ko nibura amaze kugira miliyoni $2.5.

Mu gihe amajwi yakongera kubarurwa bagasanga Clinton yaribwe muri izo leta eshatu, yahita atsinda amatora kuko yakwisanga agize abatora banini 278, bivuze ko umunyemari Trump yahita agira 260.

Gusa hari umunsi wo gusiganwa basaba ko amajwi yakongera kubarurwa kandi bakishyura amafaranga bisaba, kuko muri Wisconsin ni ukutarenza kuri uyu wa Gatanu, mu gihe Pennsylvania ari kuwa Mbere naho Michigan bikaba kuwa Gatatu mu cyumweru gitaha.

Trump waherukaga kumvikana anenga uburyo bwa Electoral College avuga ko budaha umwanya demokarasi, yongeye kumvikana abushimagiza.

Ati "Twageze muri leta zigera muri 22, mu gihe iyo harebwa ku bwinshi bw’abaturage, wari kujya muri enye, eshatu, byari kuba ari aha ngaho. Ntabwo umuntu yari kuva muri New York. Wari kwigumira muri New York, ukigumira muri California.’’

Clinton yatsinzwe amatora harebwe ku cyitwa Electoral College, aho muri icyo gihugu abatora babarwa ari 538 muri Leta 50, barimo abasenateri 100, abadepite 435 n’abandi batatu ba District of Columbia, ari nabo batora ugomba kuba Perezida wa USA.

Leta zigenda zirushanya umubare w’abatora nk’uko zirutanwa mu bunini cyangwa umubare w’abaturage. Hagendewe ku ibarura ry’abaturage rya 2015, California ituwe na 39 144 818 ibarirwa abatora 55; Texas ifite 27 469 114 ikagira abatora 34; New York ituwe na 19 795 791 ikagira abatora 31 naho Pennsylvania ituwe na 12 802 503 ifite abatora 21.

Bivuze ko utsinda ari ugira hejuru ya kimwe cya kabiri cy’abatora 538 kingana na 270, kurusha uko habarwa ko yatowe na benshi muri miliyoni 200 ziyandikishije mu itora, muri 321 418 820 batuye USA, nubwo byaje kugaragara ko hafi kimwe cya kabiri cy’abiyandikishije batatoye.

Umukandida ku mwanya wa Perezida ubonye amajwi menshi muri leta imwe, ahita ahabwa amajwi yose abarwa y’abatora bagenerwa iyo leta.

Niba nk’umukandida atsinze muri leta ya Vermont ibarirwa abatora batatu, umwe akabona muri rusange amajwi 4 100 103 undi akabona 4 100 100, utsinze atwara byose agahita abarirwa ya majwi atatu undi akagira zeru.

Ayo amajwi y’abatoye bose arakusanywa akohererezwa Perezida wa Sena ya Amerika, ari we uyafungura ku itariki 6 Mutarama akayasomera imbere y’Inteko Ishinga amategeko imitwe yombi, umukandida watowe akemezwa bidasubirwaho, akarahirira inshingano ze kuwa 20 Mutarama, saa sita z’amanywa.

Muri leta zimwe bafite itegeko ry’uko abari muri ‘Electoral College’ batora umukandida n’ubusanzwe abaturage baba bahundagajeho amajwi, mu gihe hari aho batora bakurikije intumbero y’ishyaka ryabo.

Abatora batoranywa na komite nkuru y’ishyaka, biganjemo abayobozi batorewe imyanya inyuranye muri leta zabo, abayobozi b’ishyaka cyangwa abantu bafitanye umwihariko n’umukandida uri kwiyamamaza.

Si ubwa mbere byaba bibaye ko Perezida ugiyeho kubera Electoral College atari we watowe n’abaturage benshi, kuko nko mu 2000, abaturage benshi batoye Al Gore na 51%, George W. Bush atorwa na ‘Electoral College ku majwi 271 kuri ya mugenzi we 266.

Ubu buryo bw’itora bwaje mu 1787 ubwo abayobozi bacuraga Itegeko Nshinga rya Leta zunze ubumwe za Amerika, batekereje ko hakenewe ko igihugu cyose gifite uburenganzira busesuye bwo gutora ugomba kuba Perezida.

Ababiteguye kandi banze ko leta zituwe cyane zagira uburenganzira bukubye ubw’izindi mu kugena ugomba kuba Perezida, ukaba wasanga ibindi bice bya Amerika bitabigiramo uruhare, cyane cyane leta nto.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved