Kwamamaza

Ibintu bitanu Donald Trump atandukaniyeho n’abaperezida 44 bamubanjirije

Yanditswe kuya 9-11-2016 saa 13:52' na Cyprien Niyomwungeri


Kugeza ubu ibyavuye mu matora y’umukuru w’igihugu cya Leta zunze ubumwe za Amerika, USA, biragaragaza ko ntakabuza Donald Trump, umukandida w’Umu-Republicain, ariwe Perezida wa 45 w’iki gihugu cy’igihangange.

Intsinzi y’uyu muherwe yamenyekanye nyuma yo gutsinda muri Leta ya Pennsylvania akagira amajwi 274 kuri 215 ya Hillary Clinton bari bahanganye.

Trump w’imyaka 70 afite byinshi atandukaniyeho n’abandi baperezida bamubanjirije kuyobora USA, yaba mu mibereho isanzwe nk’umunyemari no muri politiki nkuko euronews yabishyize ahagaragara.

Ubutunzi

Ni ibisanzwe ko umuperezida ava ku ntebe y’ubuyobozi agakorera ubutunzi mu bikorwa bitandukanye. Trump we ibi ntabwo ari byo atezeho amakiriro kuko afite ubutunzi bukomeye yagezeho mbere y’uko aba Perezida. Niwe Perezida wa mbere utowe ari umuherwe kurusha abandi bose banyuze muri White House.

Ikinyamakuru Forbes giherutse gutangaza ko umutungo we muri uyu mwaka ubarirwa muri miliyari 3.7 z’amadolari ya Amerika.

Icyakora si we wenyine ubaye Perezida akomoka mu muryango ukize kuko John F Kennedy, Theodore Roosevert na Franklin Roosevelt bari bafite umutungo ukomeye.

Imyaka ye yatumye aca agahigo

Imwe mu ntwaro Trump yitwazaga mu kwiyamamaza, ni ukuririra ku bihuha byavugwaga ku buzima bwa Hillary Clinton. Gusa hari abasanga hari iyindi turufu yari kwifashisha y’uko muri Kamena yujuje imyaka 70 agahita arusha Clinton umwaka umwe.

Iyi myaka ituma aba uwa mbere ugiye kwicara muri White House akuze kuruta abandi, kuruta Umu-Republicain Ronald Reagan, wari ufite imyaka 69 wagiye ku butegetsi mu 1980. Reagan yavuye ku butegetsi yujuje imyaka 78 aba uwa mbere uvuye muri White House akuze. Aka gahigo Trump azagakuraho kuko ashobora kuzavaho ku myaka 79.

Yubatse inzu zimwitirirwa

Abandi baperezida bagiye bitirirwa inyubako cyangwa ibindi bintu nyuma yo kuva ku butegetsi cyangwa gupfa. Trump we agiye ku butegetsi afite imiturirwa imwitirirwa ‘Trump Tower’. Urugero ni iyo yubatse mu mujyi wa New York mu 1983.

Uyu muturirwa niwo atuyemo agakoreramo n’ubucuruzi bwe. Ni naho hakorerwaga ikiganiro ‘The Apprentice’ yakoraga kuri Televiziyo ya NBC.

Hari abaperezida bitiriwe ibintu batakiyobora nka; John F Kennedy witiriwe ikibuga mpuzamahanga cy’indege, Washington wakorewe urwibutso nurwa Lincoln ruri i Washington DC.

Ubunararibonye muri politiki

Benshi bahaga amahirwe Hillary Clinton bashingiye ko ari inararibonye muri politiki by’umwihariko akaba yarabaye Umusenateri guhera muri 2001.

Trump ni we Perezida wa mbere ugiye kuyobora USA atarigeze agira umwanya n’umwe muri politiki, muri make nta bunararibonye yigeze.

Nka Barack Obama muri 2009 yabaye Perezida amaze imyaka irenga 10 ari umusenateri.

Gutandukana n’abagore benshi

Ku ngingo ijyanye no gutandukana n’abagore, Trump aciye agahigo ko kuba Perezida watandukanye n’abagore babiri akaba uwo babana ari uwa gatatu.

Trump amaze gutandukana na Ivana Zelníčková na Marla Maples. Kuri ubu abana n’umunyamideli Melania Trump. Abo bagore bose yababyayeho abana batanu.

Byavugwaga ko undi muperezida wa USA watandukanye n’umugore ari Reagan wabikoze nawe mbere yo kuba Perezida.

Donald Trump atowe nka Perezida watanzweho umukandida n’ishyaka ry’Aba-Republicain ariko yigeze no kuba Umu-Democrate avamo.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved