Ibya François Fillon mu matora mu Bufaransa bikomeje kuba nk’akabaye icwende

Yanditswe na Jean Luc K. Mugisha
Kuya 13 Werurwe 2017 saa 12:56
Yasuwe :
0 0

Umukandida François Charles Amand Fillon uhagarariye ishyaka ry’aba-Républicains mu matora y’umukuru w’igihugu mu Bufaransa akomeje kotswa igitutu nyuma y’iminsi mike bitangajwe ko yakiriye impano y’amakoti yahawe n’inshuti ye itatangajwe amazina.

Mu bikorwa bye byo kwiyamamaza mu mpera z’icyumweru gishize yerekeje i Trocadéro, ibintu byamufashije guhagarika icikamo ibice ry’abamushyigikiye n’abatamushyigikiye batangira kumugarukira bashingiye ku bikorwa ateganya kuzakora naramuka atowe.

Uyu mugabo w’imyaka 63 kugira ngo yumvikanishe icyo yise “Kwiyamamaza mu buryo bushya”, yagize ibyo yemerera abayoboke ba Sarkozy kimwe n’ab’ishyaka riharanira demokarasi n’ukwishyira ukizana. Bamwe mu bayobozi bakuru bamugarukiye nyuma yo kutabivugaho rumwe.

Abakurikiranira hafi ibya politiki yo mu Bufaransa bibaza niba kongera kwiyamamaza mu isura nshya mu cyumweru cya kabiri, bishobora gufasha François Fillon kongera kugirirwa icyizere kuko hari byinshi agihanganye na byo.

Nubwo hashyizweho ikipe nshya izafasha François Fillon mu bikorwa byo kwiyamamaza no guha isezerano abantu bose kwibona mu mugambi wa politiki bahuriyeho, uyu mukandida ntiyorohewe.

Mu nkuru ya Le Canard enchaîné, hatangajwe ko uyu mudepite atamenyesheje Urwego Rukuru rubishinzwe inguzanyo ya 50.000 by’amayero yahawe n’inshuti ye, Marc Ladreit de Lacharrière umuherwe ukuriye "La Revue des deux Mondes", sosiyete bivugwa ko umugore wa Fillon yakozemo bya baringa hagati ya 2012 na 2013.

Kuri iki kibazo cya "Penelope Gate", Fillon yakunze guhakana, avuga ko ari "politiki yo kumuca intege". Uyu mugabo yibasiwe bikomeye n’itangazamakuru nyuma yo kuvuga ko ahimbirwa ibintu bitagira ibimenyetso.

Imyambaro François Fillon yahawe yateje umwiryane

Ibinyamakuru byo mu Bufaransa bitangaza ko uyu mukandida yakiriye imyambaro ifite agaciro k’ibihumbi 485 by’ama-euro yahawe n’umudozi w’i Paris.

Mu kiganiro yagiranye na Echos yo kuri uyu wa 13 werurwe, yagize ati "Ubuzima bwanjye bwite bwibasiwe. Sinzi ubiri inyuma.”

Icyo kinyamakuru gikomeza kivuga ko ku itariki 20 Gashyantare hatanzwe 13000 y’ama-euro yishyuriwe kuri banki, ikiguzi cy’ imyambaro ibiri yaguzwe Arnys, umudozi uhenze w’i Paris. Hiyongeraho 35.500 ama-euro yishyuwe mu ntoki kuri uwo mudozi, yose hamwe agera ku 48.500 y’ama-euro kuva mu 2012.

"Biratangaje cyane"

Kuri icyo kibazo, abakorana bya hafi n’uyu mukandida babajijwe n’iki kinyamakuru JDD bavuga ko bitangaje cyane kuvuga ko imyambaro yishyuwe mu ntoki. Bashimangira ko nta nzu y’ubucuruzi yihagazeho yakira amafaranga angana atyo mu ntoki nk’uko byemejwe.

Ku rubuga rwe rwa Twitter, Olivier Faure ukuriye itsinda ry’aba-socialiste mu nteko yibajije "icyo ushinzwe imyitwarire atekereza ku mudepite wakira imyambaro ya 50.000 y’ama-euro mu gihe itegeko risaba kwanga impano zirengeje 150 y’ama-euro?" Ni icyemezo cya 2011 cy’inteko.

Ku wa 13 werurwe, uyu mukandida ukomeje gushyirwa mu majwi aratangaza umurongo mugari hagamijwe guhuriza hamwe abarwanashyaka. Agomba kwivuguruza kuri gahunda zimwe na zimwe mu gihe arizo zamufashije kwemerwa, harimo nko kumanura imyaka yo gukurikiranwa mu mategeko ikagera kuri 16.

Usibye uburemere bw’abashyigikiye Sarkozy, Fillon agomba guhangana n’amatariki y’ubucamanza. Ku wa 15 werurwe aritaba umucamanza, ibintu bimusaba no kubona igihe cyo kubonana n’umunyamategeko. Ni mu gihe kandi afite irindi hurizo ryo guha umurongo amatora amaze amezi abiri arangwa n’imvugo zibasira itangazamakuru n’ubutabera.

François Fillon uhagarariye ishyaka ry’aba-Républicains yikomye abanditse amagambo asebya umukandida Emmanuel Macron bahanganye, avuga ko uwabikoze azabihanirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza