Ibyo wamenya kuri Françoise Battencourt, umugore wa mbere ukize ku isi

Yanditswe na Bizimana Jonathan
Kuya 28 Nzeri 2017 saa 02:46
Yasuwe :
0 1

Umwanditsi w’Umufaransa, Françoise Bettencourt-Meyers, ni we mugore wa mbere ku isi wibitseho agatubutse nk’uko bigaragazwa n’ibyegeranyo bikorwa n’ibinyamakuru bikomeye mu by’ubukungu.

Ibi yabigezeho nyuma y’urupfu rwa nyina, Liliane Bettencourt witabye Imana ku ya 21 Nzeri 2017, akaza kumuraga imitungo yari afite irimo n’imigabane ingana 1/3 yo mu Ikompanyi ikora ibijyanye n’amavuta n’amasabune ya L’Oreal.

L’Oréal S.A. iyoborwa na Jean Paul Agon kuva muri Mata 2005; ni Ikompanyi ifite icyicaro i Clichy mu Majyaruguru ashyira Uburengerazuba bw’Umujyi wa Paris mu Bufaransa. Iyi Kompanyi yashinzwe ku ya 30 Nyakanga 1909, yungutse miliyari zigera kuri €3.106 mu 2016.

Bettencourt wari ufite imyaka 94 yasize umutungo ubarirwa muri miliyari $39.5, byamugiraga umugore wa mbere ukize ku isi n’uwa 14 ku rutonde rusange nk’uko Forbes Magazine yabitangaje. Umutungo we warazamutse ugera kuri miliyari $44.9 muri Nzeri 2017.

Uyu mukecuru wari warashakanye n’Umunyapolitiki w’Umufaransa, André Bettencourt, na we waje kwitaba Imana mu Ugushyingo 2007, byatumye umutungo we ungana na miliyari wose wegurirwa, Françoise Bettencourt, umwana umwe rukumbi bari bafitanye.

Bettencourt Meyers asanzwe azwiho gucuranga piano amasaha menshi ku munsi, akaba ari n’umwanditsi w’ibitabo. Yanditse ibitabo bibiri birimo ’A five-volume study of the Bible’ na ’A genealogy of the Greek gods’. Yakuriye mu muryango w’abakirisitu Gatolika, ashakana na Jean-Pierre Meyers, ubu bakaba bafitanye abana babiri b’abahungu.

Tom Sancton, wanditse "The Bettencourt Affair" yatangaje ko Meyers akunda kwigumira mu rugo iwe. Akomeza avuga ko n’ubusanzwe igihe yari akiri umwana muto, yabaga abangamiwe n’ubuzima buhenze bw’abakire yabagamo, akaba yarahoraga yicecekeye.

Uko kwimenyera ibye rero, bishobora kutazamworohera niba ashaka kuguma ku mwanya wa kane w’abaherwe bo mu Burayi, nk’uko ikinyamakuru Bloomberg cyabitangaje.

Uretse gukunda umuziki no kwandika ibitabo, Bettencourt Meyers akora ibikorwa by’urukundo, nta nyungu ategereje. Gusa, Ikompanyi izwi nka L’Oreal, inafite ibikorwa by’ubucuruzi bikomeye, ntijya ikunda gusabana n’abandi baherwe bo mu Bufaransa kuva aho umugabo wa Liliane Bettencourt, atabarukiye.

Uyu muherwe w’umugore Bettencourt Meyers, ngo ntiyakunze kumvikana na nyina Liliane Bettencourt. Nyuma y’urupfu rwa se ngo Meyers yamaze imyaka myinshi ajyana nyina Liliane mu nkiko amushinja kuba atuzuye mu mutwe. Kimwe mu byatumye afata nyina gutyo ni uko ngo hari ubwo yigeze guha inshuti ye impano ya miliyari imwe y’amayero.

Mu mwaka wa 2011, nibwo umucamanza w’Umufaransa yemeje ko Bettencourt Meyers n’abahungu be ari bo bazajya bareberera inyungu za nyina Liliane Bettencourt.

Françoise Battencourt ni we mugore wa mbere ku isi wibitseho agatubutse
Liliane Bettencourt yitabye Imana afite imyaka 94
Françoise Bettencourt mu muhango wo gushyingura umubyeyi we witabye Imana

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza