Imwe muri sosiyete z’indege zikomeye mu Bwongereza yahagaritse ingendo

Yanditswe na Cyprien Niyomwungeri
Kuya 2 Ukwakira 2017 saa 11:18
Yasuwe :
0 0

Sosiyete ya Gatanu mu zikomeye zikora ubwikorezi bw’indege mu Bwongereza, Monarch Airline, yahagaritse ingendo zayo bitewe n’igihombo yagize umwaka ushize kingana na miliyoni 291 z’ama-pound.

Kuri uyu wa Mbere Minisitiri ushinzwe ubwikorezi, Chris Grayling, yatangaje ko hatangiye gushakishwa uburyo bwafasha abagenzi bagera 110 000 gusubira mu Bwongereza kuko indege zagombaga kuzabatwara zahagaritse ingendo.

Monarch Airline yakoraga ingendo zerekeza mu bice byo hafi y’inyanja ya Méditerranée, Chypre, Misiri, u Bugereki na Turikiya, ndetse yakoreshaga abakozi 2 100.

Inkuru ya CNN ivuga ko ikigo gishinzwe indege za gisivili mu Bwongereza cyatangaje ko ingendo zose z’iyi sosiyete ziva cyangwa zijya muri iki gihugu zakuweho, kandi byagize ingaruka ku bakiriya bayo bagera ku 110 000 yagombaga gutwara mu byumweru bibiri biri imbere.

Iki kigo cyavuze ko kirimo gutegura uko cyashaka izindi ndege 30 zacyura abo bagenzi. Gisobanura ko ari ubwa mbere sosiyete y’ubwikorezi yikuye ku isoko mu Bwongereza. Iki kigo cyanatangaje ko nibura ingendo z’abari barateganyije kujyana na Monarch zigera 300 000 zakuweho, bishobora kugira ingaruka ku bantu bagera ku 750 000.

Blair Nimmo wo mu kigo KPMG cyahawe kugenzura ibibazo bya Monarch Airline, yatangaje ko iki kigo cy’indege kitagifite ubushobozi bwo guhangana n’ibibazo bishingiye ku bukungu.

Yagize ati “Igitutu gishingiye ku izamuka ry’ibiciro by’ibikomoka kuri peteroli no guhangana ku isoko ry’i Burayi biri mu byatumye iki kigo cya Monarch kigwa mu bihombo bidashira.”

Ibikorwa by’iterabwoba mu bihugu nka Misiri, Tunisia na Turikiya nabyo biri mu byatumye iki kigo gihomba.

Urubuga rwa Monarch Airline ruburira abagenzi bafite amatike y’iyi ndege kudata umwanya wabo bajya ku kibuga cy’indege kuko nta ngendo zirimo gukorwa. Ibintu byarakaje benshi nkuko imbuga nkoranyambaga zitandukanye zibigaragaza.

Guhomba kw’iki kigo cy’indege kubayeho nyuma y’ibindi byo mu Burayi biri mu bibazo binyuranye. Air Berlin (AIBEF) ya kabiri mu Budage yatangaje ko yahombye muri Kanama uyu mwaka, Sosiyete ya Leta y’ubwikorezi bw’indege mu Butaliyani ‘Alitalia’ nayo yarahombye bituma ishyirwa ku isoko.

Sosiyete y’indege ya Ireland ‘Ryanair’ ari nayo nini mu Burayi, yahagaritse ingendo zibarirwa mu bihumbi kubera kubura abapilote.

Sosiyete y’indege ‘Monarch Airline’ yo mu Bwongereza yahagaritse ingendo zayo

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza