Indege za Boeing 737 MAX zahitanye ubuzima bw’abantu 346 zigiye kongera gukoreshwa

Yanditswe na IGIHE
Kuya 4 Kamena 2019 saa 01:58
Yasuwe :
0 0

Sosiyete ikora indege yo muri Leta Zunze Ubumwe za Amerika, Boeing, yatangaje ko mu mpera za 2019 izaba yagaruye mu ngendo zayo izo mu bwoko bwa 737 Max zamaganwe nyuma yo gukora impanuka inshuro ebyiri mu mezi atanu.

Umuyobozi wa Boeing, Dennis Muilenburg, yabitangaje ku wa 3 Kamena 2019. Yavuze ko iyi sosiyete iteganya gusubukura ingendo z’izo ndege mu bice bitandukanye by’Isi.

Impanuka zabereye muri Indonesia na Ethiopia zombi zakozwe n’indege za Boeing 737 Max, zatumye zikumirwa mu bice bitandukanye by’Isi.

Muri Werurwe 2019 nibwo indege ya Boeing yo mu bwoko bwa 737 Max ya sosiyete ya Ethiopian Airlines yahanutse ihitana abantu 157 bari bayirimo. Iyo mpanuka yakurikiye indi ya Sosiyete Lion Air yo muri Indonesia yabaye mu Ukwakira 2018, igahitana abantu 189.

Izo mpanuka byatangajwe ko zatewe na porogaramu z’ubwo bwoko bw’indege zifasha abazitwaye kugenzura ibijyanye no kuzamuka cyane mu kirere.

Boeing iheruka gutangaza ko yamaze gutegura imfashanyigisho nshya zizafasha abapilote kumenya neza uburyo bwo gukoresha iyo porogaramu.
Iyi sosiyete yatangiye kugerageza ingendo yifashishije abagenzura ikirere ndetse itegereje guhabwa icyangombwa bitarenze uyu mwaka ngo yongere gutangira ingendo ikoresheje indege za 737 Max.

Mu kiganiro na CNBC, Muilenburg ntiyatangaje igihe Boeing izahererwa uburenganzira n’Ikigo gishinzwe Indege muri Amerika (FAA) ariko yo yarangije kubaka porogaramu nshya igenzura indege mu kirere.

Muilenburg yashimangiye ko Boeing iri gukora cyane ngo abantu bagifite gushidikanya bongere bagarurire icyizere indege za 737 Max.

Muri Gicurasi 2019, Dennis Muilenburg yasabye imbabazi imiryango y’abantu baguye mu mpanuka za Boeing zabereye muri Ethiopia na Indonesia.

Indege za Boeing 737 MAX zahitanye ubuzima bw’abantu 346 zigiye kongera gukoreshwa mu ngendo zitandukanye
Umuyobozi Mukuru wa Boeing, Dennis Muilenburg, aheruka gusaba imbabazi imiryango y'abaguye mu mpanuka z'indege zakozwe n'ikigo abereye umuyobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza