Inzego z’ubutasi za Amerika zashimangiye uruhare rwa Perezida Putin mu ntsinzi ya Trump

Yanditswe na Evariste Nsengimana, Ishimwe Israel
Kuya 7 Mutarama 2017 saa 11:22
Yasuwe : XX
0

Raporo y’impapuro 25 yashizwe ahagaragara n’Ibiro by’Ubutasi muri Amerika (CIA) ivuga ko Perezida w’u Burusiya Vladimir Putin yafashije Donald Trump gutsinda amatora y’Umukuru w’Igihugu yabaye mu Ugushyingo 2016.

Ivuga ko u Burusiya bwavogereye ikoranabuhanga rya Amerika bugamije kugabanya icyizere abantu bari bafitiye ishyaka ry’aba-démocrate no gutesha agaciro Umukandida waryo, Hillary Clinton muri gahunda ze zo kwiyamamaza.

Iyi raporo igira iti “Twasanze Perezida Putin yaratanze amabwiriza yo kwinjira mu mabanga y’ibikorwa byo kwiyamamaza mu matora ya 2016. U Burusiya bwari bashyigikiye Perezida watowe Donald Trump. Ibyo turabyizeye.”

Iyo raporo nta bimenyetso bifatika igaragaza ku ruhare rwa Putin ariko ivuga ko u Burusiya bwinjiriye email za Komite y’aba –démocrate n’abayobozi bayo, bukorana n’imbuga za WikiLeaks, DCLeaks na Guccifer 2.0 mu kubona amabanga yabo no kwishyura imbuga nkoranyamabaga ngo bivugweho amagambo atari meza.

Umuyobozi wa WikiLeaks, Julian Assange yatangaje ko u Burusiya atari bwo bwabahaye amakuru ajyanye na email zo mu ishyaka ry’aba-démocrate .

Kuva CIA yatangaza ibi, Putin na Leta y’ u Burusiya ntibaragira icyo babivugaho uretse ko batahwemye guhakana uruhare mu byo bashinjwa.

Iyi raporo yahise ishyikirizwa Perezida Obama kuwa Kane, yasohowe nyuma y’uko yari imaze kwerekwa Perezida uheruka gutorwa Donald Trump mu nama yabereye kuri Trump Tower yamuhuje n’Umuyobozi Mukuru mu Kigo cy’Ubutasi, Gen James Clapper, uwa CIA, John Brennan n’uwa FBI James Comey.

Trump uzarahira kuya 20 Mutarama yatangaje ko bagiranye ibiganiro byubaka.

BBC dukesha iyi nkuru ivuga ko nyuma yo guhabwa amakuru yimbitse ku ruhare rw’u Burusiya mu matora aheruka, Perezida uheruka gutorwa, Trump yahise atangaza ko nta kintu na kimwe byahinduye ku byavuye mu matora.

Kuva yatorerwa kuyobora Amerika kuya 8 Ugushyingo 2016,Trump yakomeje guhakana ibirego byo kudobya amatora ubutasi bw’igihugu cye bwashinjaga u Burusiya mu matora.

Mu itangazo yasohoye yagize ati “Mukwiye gushimirwa akazi mwakoze mu gushaka amakuru ku bagize uruhare mu matora. Guverinoma, imiryango itandukanye ndetse n’ibigo by’imari tugomba kurwanya ibi bikorwa twivuye inyuma. Nzashyiraho itsinda rishinzwe kubirwanya rizampa gahunda mu minsi 90 nimara kujya ku butegetsi.”

Mbere yo guhabwa amakuru ku bujura bw’amatora, Trump yakunze kuvuga ko ibyatangazwaga ari umukino wa politiki.

Yatangarije New York Times ko ibigo byinshi byo muri Amerika byagiye bishaka kwibwa amakuru, ariko itangazamakuru ntiryabitinzeho cyane.

Uburiganya bushinjwa u Burusiya mu matora bwatumye Perezida uri gucyura igihe Barack Obama yirukana abadipolomate 35 b’iki gihugu ku butaka bwa Amerika.

Putin akomeje gushinjwa kudobya amatora ya Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza