Inzozi za Juppé zo kuyobora u Bufaransa zayoyotse nyuma yo gutsindwa na François Fillon

Yanditswe na Ishimwe Israel
Kuya 28 Ugushyingo 2016 saa 07:47
Yasuwe : XX
0

Ishyaka ry’aba- Républicains mu Bufaransa ryemeje François Fillon nk’umukandida ugomba kuzarihagararira mu matora y’Umukuru w’Igihugu azaba umwaka utaha ahigitse Alain Juppé bari bahanganye.

Mu matora yabaye kuri iki Cyumweru, tariki ya 27 Ugushyingo 2016, François Fillon yatsinze ku buryo bworoshye Alain Juppé usanzwe ayobora Umujyi wa Bordeaux ku bwiganze bw’amajwi 66%.

CCN dukesha iyi nkuru itangaza ko nyuma y’iyi ntsinzi Fillon yatangarije abayoboke b’ishyaka rye ko ibyo agezeho yari abikwiye.

Ati “Intsinzi ni iyanjye, yubakiye ku cyizere nigiriye. Dufite ubushobozi bwo kubaka igihugu cyigenga kandi kiza ku isonga y’ibindi ku mugabane w’u Burayi.”

Uyu mukandida ku mwanya w’Umukuru w’Igihugu yumvikanye yikoma imiyoborere ya François Hollande,uturuka mu ishyaka ry’aba-Socialiste. Ati “ Iyi manda ya perezida ishize nta kintu kidasanzwe yakoze. Nicyo gihe cyo kuyihagarika tugatangira gukora ibindi byisumbuyeho kurusha uko twabikoze mu myaka 30 ishize. Kandi ibi tuzabigeraho ku bufatanye na buri wese.”

Mu kwezi gushize, Fillon ni umwe mu batarahabwaga amahirwe ariko yaje kwigaragaza cyane mu biganiro mpaka byanyuze kuri televiziyo.

Amakuru yakusanyijwe ku ikubitiro yamushyiraga ku mwanya wa gatatu, ariko yaje kwigaragaza binyuze mu gitabo kirwanya iterabwoba ndetse na ISIS yasohoye cyitwa "Beating Islamic Totalitarianism."

Amatora y’ibanze yabaye ku ya 20 Ugushyingo yarangiye Fillon ari imbere n’amajwi 44.1%, Juppé wigeze kuba Minisitiri w’Intebe abona 28.6%, naho Nicolas Sarkozy wigeze kuba Perezida w’u Bufaransa aza ku mwanya wa gatatu n’amajwi 20.6%, ahita anasezererwa.

Fillon ni umunyamategeko, yabaye Minisitiri w’Intebe hagati ya 2007 na 2012 ku butegetsi bwa Nicolas Sarkozy .

Uyu mugabo w’imyaka 62, benshi mu Bafaransa bamugereranya na Margaret Thatcher wigeze kuba Minisitiri w’Intebe mu Bwongereza kubera Politiki ye yo guteza imbere imibereho myiza y’abaturage n’izindi gahunda za Leta.

Fillon ashobora kuzahangana na Marine Le Pen wo mu ishyaka rya Front National, mu matora y’Umukuru w’Igihugu ateganyijwe muri 2017.

François Fillon yemejwe nk'umukandida uzahagararira ishyaka ry’aba- Républicains mu matora y'Umukuru w'Igihugu
Meya w'Umujyi wa Bordeaux, Alain Juppé wahabwaga amahirwe yasezerewe rugikubita

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE