Ishoramari rya Trump ryahombye miliyari $1 mu myaka 10

Yanditswe na Ishimwe Israel
Kuya 8 Gicurasi 2019 saa 08:44
Yasuwe :
0 0

Urutonde rwo ku wa 5 Werurwe 2019 rwashyizwe ahagaragara n’ikinyamakuru, Forbes Magazine, rugaragaza ko Perezida Donald Trump afite umutungo ubarirwa muri miliyari $3.1, aho ari ku mwanya wa 715 mu bafite agatubutse ku Isi n’uwa 259 muri Amerika.

Perezida Trump yamamaye cyane mu bikorwa by’ubucuruzi mbere yo kwinjira muri politiki yamugejeje mu byicaro byo kuyobora Amerika.

Uyu mukuru w’Igihugu ariko umutungo we ugenda ugabanuka bitewe n’igihombo ishoramari rye rihura nacyo.

Mu nkuru ya The New York Times yo ku wa Kabiri, yatangaje ko ibikorwa by’ishoramari rye byahombye miliyari $1.17 hagati ya 1985 na 1994 nkuko icyo kinyamakuru cyabibonye mu nyandiko z’imisoro z’icyo gihe.

Iki gihombo ngo kiri hejuru ku buryo nta wundi mushoramari wakigize muri Amerika.

Trump yiyamamarije kuyobora Amerika agaragaza ko ari umuherwe ariko amakuru yerekeranye n’imisoro ntiyakunze gutangazwa muri rubanda.

Ku wa Mbere, Umunyamabanga w’Ibiro bishinzwe umutungo wa Leta Zunze Ubumwe za Amerika, Steven Mnuchin, yanze gutanga raporo ku buryo Trump yishyuye imisoro mu myaka itandatu ishize.

Muri izo nyandiko bigaragaza ko mu 1990 na 1991, ishoramari ry’ingenzi rya Trump ryahombye arenga miliyoni $250 buri mwaka, ubwikube kabiri bw’abandi baherwe bishyura imisoro.

Perezida Trump yatakaje amafaranga menshi kubera kutishyura imisoro mu myaka umunani mu 10 nkuko byagaragajwe.

Uyu Mukuru w’Igihugu kandi byari byatangajwe ko yigeze gufasha ababyeyi be guhunga kwishyura imisoro ahagana mu 1990, ndetse we n’abavandimwe be babafashije guhisha miliyoni z’amadolari yatanzwe nk’impano.

Mu nkuru icukumbuye yakozwe na The New York Times hagendewe ku nyandiko za paji zirenga ibihumbi 100, iki kinyamakuru cyavuze ko Trump kuva afite imyaka itatu yahawe na se amafaranga agera kuri miliyoni $413.

Umwunganizi wa Trump mu mategeko, Charles J. Harder, yavuze ko amakuru ku misoro yatangajwe adafite ishingiro nubwo atagaragaje inenge iyarimo.

Ubukungu bwa Donald Trump bwasubiye inyuma kuko mu 2017 ku rutonde rw’abaherwe 400 bo ku mugabane wa Amerika, yari ku mwanya wa 248 mu gihe mu 2016 yari ku wa 156.

Mu 2015, Trump yari ku mwanya wa 121 muri 400 bakize muri Amerika, afite umutungo usaga miliyari $4,5; 2016 yaramanutse agera ku mwanya wa 156 n’umutungo wa miliyari $3,7 mu 2017 agera ku mwanya wa 248 n’umutungo wa miliyari $3.1. Ni ukuvuga ko umutungo we wagabanutseho miliyoni zisaga 600 hagati ya 2016 na 2017.

Ibikorwa by'ishoramari rya Perezida wa Leta Zunze Ubumwe za Amerika, Donald Trump byahombye asaga miliyari $1 mu gihe cy'imyaka 10

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza