Israel: Netanyahu yatangiye gukorwaho iperereza ku byaha bya ruswa akekwaho

Yanditswe na Mukaneza M.Ange
Kuya 3 Mutarama 2017 saa 07:31
Yasuwe : XX
0

Nyuma y’uko mu Cyumweru gishize, Intumwa Nkuru ya Leta itanze uburenganzira bwo gukora iperereza kuri Minisitiri w’Intebe wa Israel, Benjamin Netanyahu kubera ibyaha bya ruswa akekwaho, kuri uyu wa Mbere nibwo polisi iri butangire kumuhata ibibazo.

Netanyahu akekwaho kuba yarakiriye impano z’abacuruzi bakomeye bo muri Israel ndetse n’iy’Umufaransa Arnaud Mimran, wakatiwe igifungo cy’imyaka umunani azira kunyereza imisoro ifite agaciro ka miliyoni 283 z’amayero, asaga miliyari 243 mu mafaranga y’u Rwanda.

Ibinyamakuru byo muri Israel byatangaje ko kuri uyu wa mbere aribwo polisi iza gutangira guhata ibibazo Netanyahu wasabye ko bamusanga iwe mu rugo mu Mujyi wa Yerusalemu.

Ubwo babazwaga na AFP ariko yaba abavugizi ba Polisi n’Ibiro bya Minisitiri w’Intebe ntawigeze ahakana cyangwa ngo yemeze ibijyanye n’iri perereza.

Mu butumwa aherutse kwandika ku rukuta rwa Facebook, Netanyahu yatangaje ko ibyo ashinjwa ari ibinyoma byihishwe inyuma n’abatavuga rumwe nawe bifuza ko ava ku butegetsi bitanyuze mu matora.

Muri Kamena 2016 nibwo byatangajwe ko Umuyobozi mukuru wa Polisi ya Israel, Roni Alsheikh yaba yarasabye itsinda ry’ubutasi gukora iperereza kuri Netanyahu ariko mu ibanga.

Ubutabera bwa Israel buhana bwihanukiriye buri wese ufatiwe mu mutego wo kurya ruswa kuko n’uwahoze ari Minisitiri w’Intebe, Ehud Olmert, ari nawe Netanyahu yasimbuye muri Gashyantare umwaka ushize yakatiwe igifungo cy’amezi 19 muri gereza nyuma yo kwakira ruswa.

Minisitiri w’Intebe wa Israel, Benjamin Netanyahu yatangiye gukorwaho iperereza kubera ibyaha bya ruswa akekwaho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza