Israel yarakariye bikomeye ibihangange birimo na Amerika

Yanditswe na Jean Pierre Tuyisenge
Kuya 26 Ukuboza 2016 saa 06:58
Yasuwe : XX
0

Minisitiri w’Intebe wa Israel, Benjamin Netanyahu, yahamagaje Ambasaderi wa Leta Zunze Ubumwe za Amerika muri iki gihugu, Dan Shapiro, ngo baganire nyuma y’itorwa ry’itegeko ry’akanama gashinzwe Umutekano mu Muryango w’Abibumbye ribuza icyo gihugu gukomeza kubaka mu karere ka West Bank yigaruriye gaherereye muri Palestine.

Benjamin Netanyahu ari kumwe na Minisitiri w’Ububanyi n’Amahanga, yafashe icyemezo kidasanzwe cyo guhamagaza Dan Shapiro mu biro bye.

CNN ivuga ko ibyo bibaye nyuma y’aho Minisiteri y’Ububanyi n’amahanga y’iki gihugu ihamagarije abandi ba Ambasaderi 10 bahagarariye ibihugu byabo muri Israel byashyigikiye icyemezo cya ONU cyatowe ku wa Gatandatu, ariko bo bakaba batarahuye na Netanyahu.

Abo ba Ambasaderi barimo uw’u Bushinwa, u Bufaransa, u Burusiya, u Bwongereza, Angola, Misiri, u Buyapani, Espagne, Ukraine na Uruguay.

Abo bose ngo batumijwe ku bw’uburakari bukomeye bw’iki gihugu bitewe n’uko bemeje uyu mwanzuro, ibintu Israel ngo itari yiteze.

Ambasaderi wa Israel muri Amerika, Ron Dermer, yatangaje ko Netanyahu yatumije Shapiro kugira ngo baganire amaso ku maso bitewe n’uko Leta Zunze Ubumwe za Amerika ngo ari cyo gihugu baba biteze ko kiza kubashyigikira imbere y’Umuryango w’Abibumbye.

Kuri iki Cyumweru Netanyahu yatangaje ko nta gushidikanya ko ubuyobozi bwa Perezida Obama ari bwo bwihishe inyuma y’uyu mwanzuro.

Ati “Amakuru dufite, nta gushidikanya ubutegetsi bwa Obama ni bwo bwabikoze, bugashyigikira icyo cyemezo, busaba kugishyira mu bikorwa kandi bukemera ko gitorwa."

Ibi birego byose byatewe utwatsi na Leta Zunze Ubumwe za Amerika, binyuze mu ijwi ry’Umujyana wungirije mu by’umutekano wa Perezida Obama, Ben Rhodes.

Israel ivuga ko ihangayikishijwe n’uko Umuryango w’Abibumbye ushobora gutora undi mwanzuro ushyiraho ibiganiro by’amahoro hagati y’igihugu cyabo na Palestine.

Umwanzuro uwo ari wo wose ureba iki gihugu ngo ushobora kuzafatwa ku wa 15 Mutarama 2017 mu nama Mpuzamahanga yiga ku mahoro izateranira mu Bufaransa, inama iki gihugu cyavuze ko kitazitabira.

Iki cyemezo kibaye icya mbere gihagaritse ibikorwa bya Politiki ya Israel byo kwigarurira uturere twa Palestine kuva mu mwaka wa 1979. Ibikorwa bya Israel muri kariya gace bifatwa nk’ibitubahirije amategeko mpuzamahanga.

BBC ivuga ko Netanyahu na Perezida Obama batigeze bagirana umubano mwiza mu gihe cya manda ebyiri amaze ku butegetsi ndetse ngo Israel yakomeje kugira ubwoba ko ubutegetsi bwa Obama buzafata icyemezo gikakaye mu mpera z’ubutegetsi bwe.

Perezida uherutse gutorwa muri Amerika, Donald Trump yanditse kuri Twitter ko itorwa ry’icyo cyemezo ari igihombo gikomeye kuri Israel, bikazatuma bigorana kugirana ibiganiro by’amahoro, ariko yiyemeza ibintu byose bizahinduka muri ONU namara kujya ku butegetsi byeruye ku wa 20 Mutarama 2017.

Umuryango uharanira uburenganzira bwa muntu ku Isi (HRW), utangaza ko mu gace ka West Bank, Israel yahubatse amazu 137 yatujwemo abaturage bayo barenga ibihumbi 500.

Dan Shapiro (ibumoso) yahamagajwe na Netanyahu nyuma y'uko Amerika yifashe ku mwanzuro uhagarika imishinga ya Israel muri Palestine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza