Kiliziya Gatolika igiye gusuzuma uko abagabo bafite abagore bagirwa abapadiri

Yanditswe na Sekamana Mathias
Kuya 18 Kamena 2019 saa 08:23
Yasuwe :
0 0

Kiliziya Gatolika irimo gusuzuma uburyo ishobora kwemerera abagabo bafite abagore kuba abapadiri mu duce twegereye uruzi rwa Amazon muri Amerika y’Epfo.

Utu duce twa kure turi mu mashyamba y’inzitane, tuvugwaho kutagira abapadiri gukabije mu gihe Amerika y’Amajyepfo ituwe cyane n’abayoboke ba kiliziya Gatolika.

Izi mpinduka niziramuka zemejwe, nizo mpinduka zikomeye zizaba zibaye muri iri dini mu gihe cy’imyaka 100 ishize.

Izi mpinduka zashimwe mu nyandiko yihariye ku bidukikije ya Papa yasohotse mu mwaka wa 2015.

Muri iyo nyandiko, Papa Francis uyobora Kiliziya Gatolika kuri ubu yanditse ko ako gace ka Amazon gafite ibibazo kugira ngo bikemuke bizasaba impinduka ku bintu bimwe na bimwe bisanzwe biziranyweho n’abantu bose n’ibihugu byose byo muri ako gace bifatanyije na kiliziya.

Biteganyijwe ko iyo nyandiko izaganirwaho byimbitse mu nama idasanzwe izahuza intara zose za kiliziya gatolika mu duce twose twa Amazon izaba mu Ukwakira uyu mwaka i Roma mu Butaliyani.

Iyo nama izitabirwa n’abasenyeri n’abahagarariye abakristu bo muri ako gace kari mu bihugu bya Brazil, Bolivia, Peru, Ecuador, Colombia, Venezuela, Guyana, Suriname na French Guyana.

Aka gace gace abayoboke b’idini gatulika bagera kuri miliyoni 33 ni kamwe mu haboneka amazi meza ku isi, umwuka mwiza wo guhumeka (Oxygene) hakaba na hamwe mu hantu hatatu haboneka amashyamba kimeza ku isi.

Vatican ivuga ko ako gace gafite ikibazo gikomeye cy’abapadiri kubera imiterere yako, ariko ko icyo kibazo cy’ibura ry’abapadiri ari kiliziya igomba kugikemura mu buryo bwayo.

Iyi ngingo irebana n’agace ka Amazon niramuka yemejwe, izaha ingufu nyinshi impaka zimaze imyaka zirebana no gushaka kw’abapadiri.

Nubwo iyo nyandiko ari iya papa ariko, muri Mutarama uyu mwaka ubwo yabazwaga kuri iyi ngingo, yavuze ko ku giti cye adashaka impinduka izo ari zo zose ku bupadiri.

Kiliziya Gatolika igiye kwiga uko abagabo bashatse baba abapadiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza