Leta Zunze Ubumwe z’Abarabu ziyemeje gutuza abantu kuri Mars bitarenze mu 2117

Yanditswe na Rabbi Malo Umucunguzi
Kuya 16 Gashyantare 2017 saa 08:03
Yasuwe :
0 0

Leta Zunze Ubumwe z’Abarabu (UAE) zashyize ahagaragara umushinga wo gutuza abantu ku mubumbe wa Mars, umushinga bashaka ko waba washyizwe mu bikorwa bitarenze umwaka 2117.

Uyu mushinga wiswe "Mars 2117 Project" watangajwe kuwa Kabiri w’iki Cyumweru n’umuyobozi w’umujyi wa Dubai akaba na Visi Perezida wa Leta Zunze Ubumwe z’Abarabu, Sheikh Mohammed bin Rashid Al Maktoum, mu nama mpuzamahanga ya za Guverinoma iri kubera muri icyo gihugu, World Government Summit.

Ati"Kugera kw’abantu ku yindi mibumbe byakomeje kuba inzozi z’igihe kirekire ku bantu. Intego yacu ni uko UAE izabimburira ubushake bw’ibindi bihugu mu guhindura izo nzozi impamo.”

Nk’uko Aljazeera yabitangaje, uwo muyobozi yavuze ko igihugu cye kiri mu bya mbere ku Isi mu gushora imari ifatika mu bijyanye n’ubumenyi bw’isanzure, bakaba bifuza kwihutisha ubushakashatsi muri urwo rwego.

Yakomeje agira ati “Uyu mushinga mushya ni imbuto tubibye uyu munsi, twifuza ko ibisekuru biri imbere bizaryoherwa n’umusaruro wawo, hagamije gushyira ahagaragara ubumenyi bushya.”

Mu itangazo Guverinoma ya Dubai yashyize ahagaragara, uwo mushinga uzakorwa ku bufatanye n’ibindi bigo mpuzamahanga mu bijyanye n’ubushakashatsi mu by’ubumenyi.

Uyu mushinga ngo uzita cyane ku kubaka itsinda ry’impuguke rizafasha abantu kugera kuri uyu mubumbe utukura mu myaka iri imbere, ukazatangirira ku bahanga bo mu barabu, nyuma bakazagenda bongerwaho abandi bahanga n’abashakashatsi mpuzamahanga.

Uyu mushinga uzita cyane ku kubaka uburyo bwihuse bw’urugendo ruva cyangwa rujya kuri Mars, bakanagaragaza uko gutura aho hantu byaba bimeze, n’uko ubuzima bwaho buzaba buteye mu birebana n’ibiribwa, uburyo bw’ingendo, ingufu n’ibindi.

Muri Nyakanga 2014, UAE nibwo yatangaje ko igiye kubaka ikigo kirebana n’ubumenyi bw’isanzure, ku buryo aba barabu bazabasha ku nshuro ya mbere kohereza ikoranabuhanga ryabo kuri Mars, bitarenze 2021.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244