Mu matora yabayemo imvururu, Abanya-Catalonia bemeje kwiyomora kuri Espagne

Yanditswe na Herve Ugirumukunda
Kuya 2 Ukwakira 2017 saa 08:21
Yasuwe :
1 0

Abaturage b’intara ya Catalonia batoreye kuba igihugu cyigenga mu matora ya referandumu yabaye ejo hashize ku cyumweru, ku ya 1 Ukwakira 2017.

Abayobozi b’iyo ntara batangaje ko 90% by’abatoye bashyigikiye kwiyomora kuri Espagne, gusa amatora yitabiriwe ku kigero cya 42% gusa. Abatoye bose hamwe bangana na miliyoni 2.26. Muri bo miliyoni 2.02 batoye “Yego” naho 176 000 batora “Oya”, nk’uko Reuters ibitangaza.

Umuyobozi w’Intara ya Catalonia, Carles Puidgemont mu ijambo yanyujije kuri televiziyo, yavuze ko nubwo babangamiwe bikomeye na Espagne, babashije gutora icyo bifuje kuva kera.

Puigdemont yagize ati “Kuri uyu munsi w’icyizere n’akababaro, abaturage ba Catalonia batsindiye uburenganzira bwo kuba igihugu cyigenga kigendera ku mahame ya Repubulika. Guverinoma yanjye mu minsi mike izoherereza Inteko Ishinga Amategeko ibyavuye mu matora.”

Ni mu gihe Minisitiri w’intebe wa Espagne, Mariano Rajoy we yatangaje ko abanya-Catalonia bangije demokarasi, bakishora mu matora atemewe.

Guverinoma ya Catalonia ivuga ko abantu 844 bakomeretse abandi bagahungabana ubwo Polisi ya Espagne yashakaga kuburizamo iyo referandumu, igahangana n’abaturage, ibarasaho amasasu ya pulasitike bamwe bagakubitwa n’ibiboko.

Minisiteri y’Umutekano ya Espagne yo ivuga ko abapolisi 12 bakomeretse, abaturage batatu bagatabwa muri yombi naho ibiro by’amatora 92 bigafungwa.

Ku mugoroba wo ku Cyumweru, imbaga y’abashyigikiye ubwigenge yigabije imihanda y’Umurwa Mukuru wa Espagne, Barcelona, iririmba indirimbo za Catalonia, ari nako izunguza amabendera y’icyo gihugu.

Ni mu gihe ariko abandi badashyigikiye ubwo bwigenge nabo bigaragambije muri uwo mujyi n’iyindi igize Espagne. Catalonia iherereye mu Burasirazuba bw’amajyaruguru ya Espagne, igizwe n’intara enye, Barcelona, Girona, Lleida na Tarragona; yari isanzwe ifatwa nk’intara yigenga.

Umurwa Mukuru wayo, Barcelona, niwo mujyi wa kabiri utuwe cyane muri Espagne, ukaba uwa karindwi mu bihugu bigize Umuryango w’Ubumwe bw’u Burayi.

Abaturage bo mu Ntara ya Catalonia bigaragambije habangana na Polisi yababuzaga gutora
Guverinoma ya Catalonia yatangaje ko abantu 844 bakomeretse abandi bagahungabana ubwo Polisi ya Espagne yashakaga kuburizamo iyo referandumu
Abaturage bahanganye na Polisi ya Espagne yashakaga kuburizamo amatora
Izi mvururu zatumye umukino wa FC Barcelone ukinwa nta mufana n'umwe uri muri Stade

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza