Nigeria: Leta yasezereye abakozi ibihumbi 50

Yanditswe na Jean Pierre Tuyisenge, Uwishyaka Jean Louis
Kuya 28 Ukuboza 2016 saa 04:10
Yasuwe :
0 0

Ibiro bya Perezida wa Nigeria byatangaje ko byafashe icyemezo cyo gukura abantu 50,000 ba baringa ku rutonde rw’abakozi ba leta, umwanzuro utumye igiye gucungura miliyoni 630 z’ama-Euro yabatangagaho mu gihe ikomeje urugamba rwayo rwo kurwanya ruswa.

Umuvugizi w’Ibiro bya Perezida, Garba Shehu, yavuze ko Miliyari zigera kuri 13 z’amafaranga akoreshwa muri Nigeria (Naira) zungutswe kuva mu kwezi kwa Gashyantare kugeza mu Ukuboza hagendewe ku mishahara yishyuwe muri icyo gihe.

BBC dukesha iyi nkuru ivuga ko Perezida Muhammadu Buhari yahigiye kuzaca ruswa muri iki gihugu, ndetse ko abantu bagera kuri 11 bari gukurikiranwa na Komisiyo ishinzwe gukurikirana ibyaha byakozwe mu rwego rw’ubukungu n’imari (EFCC) ku ruhare rwabo muri ibyo bikorwa.

Umuvugizi wa Perezidansi ya Nigeria, Garba Shehu, yatangaje ko ibi byakozwe mu rwego rwo guca amanyanga akorwa na bamwe mu bagize guverinoma.

Ati “Gahunda ya Perezida Muhammadu Buhari yo guca amanyanga muri guverinoma no kwimika imiyoborere myiza irakomeje, guverinoma yatangiye kugenzura imishahara mu mirimo ya Leta.”

Perezida Buhari wa Nigeria kuva yatorwa mu mwaka ushize wa 2015, yatangije urugamba rwo kurwanya ruswa yari yarabaye umuco muri iki gihugu, ashinja guverinoma yari iyobowe na Goodluck Jonathan kuba yaranyereje umutungo wa Leta.

Ibyo byatumye bamwe mu bari mu buyobozi bukuru ku butegetsi bwa Goodluck, barimo aba minisitiri, abandi banyapolitiki n’inshuti zabo, baburanishwa kuri ibyo byaha.

Mu cyumweru gishize guverinoma yari yatangaje ko yiteguye guhemba no kurindira umutekano abantu bazajya bagaragaza abanyereje umutungo wa Leta, mu gihe Nigeria iri kurwana no kwikura mu bibazo by’ubukungu irimo.

Perezida Buhari akuye aba bantu mu bakozi ba leta nka kimwe mu bikubiye muri gahunda ye yo kurwanya ruswa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza