Obama n’umugore baciye amarenga yo kwinjira muri sinema

Yanditswe na Mukaneza M.Ange
Kuya 9 Werurwe 2018 saa 04:12
Yasuwe :
3 3

Barack Obama wahoze ari Perezida wa Leta Zunze Ubumwe za Amerika, n’umufasha we batangiye ibiganiro n’inzu y’imyidagaduro ya Netflix bishobora kubinjiza mu ruhando rwa sinema.

Umwe mu bantu bari gukurikiranira hafi iby’ibi biganiro, yavuze ko nubwo bitaragera ku musozo, impande zombi ziri kwiga ku bufatanye mu gukora ikiganiro gitambuka kuri televiziyo. Baramutse bumvikanye Obama na Michelle bagaragara muri film cyangwa ibiganiro byinshi bitambutswa na Netflix.

New York Times yatangaje iyi nkuru bwa mbere yavuze ko byaba ari amahirwe akomeye kuri Netflix ikunze gufasha abantu kureba film n’ibiganiro binyuze kuri Internet, kuko barushaho kugira serivisi zicuruza cyane. Ikindi kandi byaba urubuga rwagutse umuryango wa Obama wakoresha ukageza ubutumwa bwawo ku Isi yose.

Iki kinyamakuru cyavuze ko ibiganiro bihabwa amahirwe menshi ari icyakwibanda ku bihe bya Obama muri Perezidansi, ndetse n’ikindi cya Michelle kigaruka ku birimo gahunda z’imirire myiza yakunze gushyiramo imbaraga umugabo we akiri perezida.

Abinyujije mu itangazo, ku wa kane Umujyanama Mukuru wa Obama, Eric Schultz, yavuze ko uyu muryango iteka wizeraga imbaraga ziri mu kubara inkuru zigamije gutuma abandi bagira intego.

Nubwo atigeze agaruka ku masezerano na Netflix, Schultz yavuze ko umuryango wa Obama ukomeje gushakisha uburyo bushya wakwifashisha mu gufasha abantu gusangiza abandi inkuru zabo.

Mu myaka ya nyuma y’ubutegetsi bwa Obama, hari amakuru yavugaga ko afite gahunda yo kuzashora imari mu itangazamakuru rikoresha Internet na telefoni igendanwa.

Netflix itangaza ko ifite abantu miliyoni 117 biyandikishije ku rubuga rwayo, miliyoni 55 muri bo akaba ari ababarizwa muri Amerika.

Barack Obama na Michelle bashobora kwinjira mu ruhando rwa sinema binyuze mu masezerano na Netflix

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza