Obama yaburiye Abanyamerika mu ijambo rye rya nyuma nka Perezida wa Amerika

Yanditswe na Philbert Girinema
Kuya 11 Mutarama 2017 saa 09:23
Yasuwe : XX
0

Nyuma y’imyaka umunani ayobora Leta Zunze Ubumwe za Amerika, mu minsi 10 gusa iri imbere Donald Trump uheruka gutorwa arahirira kuyobora iki gihugu mu myaka ine iri imbere nka Perezida wacyo wa 45.

Mu ijambo rye ryagaragazaga imbamutima yavugiye mu Mujyi wa Chicago, Perezida Obama, yavuze ko Amerika iri mu mwanya mwiza kurusha uko yari imeze mu myaka umunani ishize, avuga ko atigeze atatira icyerekezo cye cy’impinduka nubwo hagiye gutangira urugendo rushya.

Obama yagarutse kuri manda ye yagize ibyiza bikomeye n’ubwo ibibazo bitabuze, avuga ko uguhangana muri politiki kwigaragaje cyane, ariko iki kikaba ari igihe cyo kwiyunga ku banyamerika.

Ati “Demokarasi ntabwo isaba ko tubona ibintu kimwe. Abatubanjirije bajyaga impaka, ntibumve ibintu kimwe ariko bakaza guhuriza hamwe. Bumvaga ko natwe ariko bigomba kuzamera. Ariko bari bazi neza ko demokarasi isaba kubanza kumva ko mugomba gutahiriza umugozi umwe… tugomba kuzamukana twanahura n’ikibazo tukaguma hamwe.”

Gusa Obama yemeye ko ubu muri politiki bisa n’aho hari guterwa intambwe ebyiri zigana imbere, hagaterwa indi imwe basubira inyuma, asaba Abanyamerika gusigasira indangagaciro zabo, arizo zibagira abo aribo.

Amashusho agaragaza ko Obama ubwo yavugaga ijambo rye, yarogowe n’abaturage bateraga hejuru bagira bati “Ndagukunda Obama”, kugeza no ku waje afite icyapa cyanditseho ngo “Tubabarire twese”, aza atera hejuru ati “turashaka indi myaka ine”.

Gusa Obama yamusubije aseka ati “Sinabikora,” cyane ko abaperezida ba Amerika batorerwa manda ebyiri z’imyaka ine, ine.

Obama yagarutse kuri bimwe byagezweho mu myaka umunani yari amaze ayobora Amerika kuva mu nzego z’ubuzima kugeza ku mibanire yo mu ngo, ariko akitsa ko akazi katarangiye.

Yashimangiye ko Donald Trump agiye kumusimbura kandi yiteguye guhererekanya ubutegetsi mu mahoro, ibintu abari imbere ye batumvaga bagatera hejuru bati “oya,oya, oya,oya,”.

Yanagarutse ku bintu bitatu bikibangamiye demokarasi ya Amerika, akomoza ku kibazo cy’ubusumbane mu bijyanye n’ubukungu, amacakubiri ashingiye ku ruhu n’ukutumvikana kwa hato na hato mu baturage bafite ibitekerezo bidashingiye ku bintu bimwe, ariko avuga ko ibyo byose bikwiye kurengwa abantu bakunga ubumwe.

Ati “Nyuma yo kuntora, havugwaga cyane Amerika ya nyuma y’ibihe by’irondaruhu. Gusa icyo kintu ntabwo cyigeze gishoboka. Kubera ko uruhu rukomeje kuba ikintu gitandukanya abantu mu baturage bacu. Maze igihe kinini cyamfashije kubona ko imibanire ishingiye ku ruhu imaze kuba myiza kurusha mu myaka 10, cyangwa 20 cyangwa 30 ishize.”

Yasabye abazungu kutabona abirabura baharanira uburenganzira bwabo nko gushaka guhabwa uburenganzira bwihariye, ahubwo nk’urugamba rwo guharanira ko abaturage bose bafatwa kimwe, nk’uko abakurambere ba Amerika babiharaniye.

Yanagarutse ku mugore we Michelle Obama, maze mu kumuvuga ijwi rye rizamo ikiniga ubwo yamutakaga ku buryo yamufashije nka Perezida wa Amerika.

Ati “Michelle LaVaughn Robinson, umukobwa wo muri South Side, mu myaka 25 ishize, ntiwabaye umugore wanjye gusa na mama w’abana banjye, wabaye inshuti yanjye magara. Wemeye inshingano utigeze usaba kandi uzubahiriza n’ubushake, umuhate n’umutima mwiza. Watumye White House iba ahantu buri wese yisanga.”

Mu ijambo rye risoza, yagize icyo asaba Abanyamerika bwa nyuma nka Perezida, ati “ndabasaba kugira icyizere. Ntimukigire mu bushobozi bwanjye nk’aho aribwo buzana impinduka, ahubwo mwizere ubwanyu.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza