Mu mubonano wabo wa mbere, Trump yise Obama ’umuntu mwiza’ (Amafoto)

Yanditswe na Ishimwe Israel
Kuya 10 Ugushyingo 2016 saa 10:42
Yasuwe : XX
141 71

Donald Trump watorewe kuyobora Leta Zunze Ubumwe za Amerika, yagiranye ikiganiro cyihariye na Perezida Barack Obama agomba gusimbura muri White House muri Mutarama 2017, baganira ku ihererekanya ry’ubutegetsi riteganyijwe mu minsi mike iri imbere.

Ibiganiro bya Trump na Obama bibaye mu gihe mu kwiyamamaza, Obama yagaragazaga ko Trump atariwe ubereye kuyobora Amerika ahubwo abantu bakwiye gutora Hillary Clinton, na Trump akavuga ko Obama ari umuyobozi wananiwe kuyobora igihugu, ndetse adashyigikiye zimwe muri gahunda yatangije.

BBC yatangaje ko nyuma y’ibiganiro byabereye mu muhezo, Trump yabwiye itangazamakuru ko byagombaga kumara iminota 15, ariko ngo kubera uburyo byari ingirakamaro bakomeje kuganira binagera mu minota isaga 90.

Ni ubwa mbere mu mateka aba bagabo bombi bari bahuye, ndetse bagirana ibiganiro.

Trump yabwiye itangazamakuru ko yiteguye kuzakomeza kuvugana na Obama mu minsi iri imbere ndetse akazamukeneraho inama zitandukanye.

Obama yavuze ko baganiriye kuri politiki mpuzamahanga n’iy’imbere mu gihugu, ndetse avuga ko yanyuzwe n’uko Trump yamugaragarije ko yifuza ko bakorana cyane mu gihe cy’inzibacyuho.

Ati "Nk’uko nabivuze mu ijoro ry’ejo, ikintu cy’ingenzi ngomba gukora mu mezi abiri ari imbere ni ukugerageza gufasha mu nzibacyuho kugira ngo Perezida watowe n’abaturage azabashe kugera ku ntego ze.’’

Obama yakomeje abwira Trump ati “Nubasha kubishobora, ni igihugu kizaba gitsinze.’’

Trump yashimiye Obama ku bw’inama bagiranye, avuga ko yagombaga kumara igihe gito, ariko iza kugira iminota myinshi.

Ati “Perezida, byari icyubahiro gikomeye kuba kumwe nawe kandi nizeye kuzakomeza guhura nawe inshuro nyinshi cyane.’’ Trump kandi yakunze kuvuga ko Obama ari ‘umuntu mwiza’.

Donald Trump yinjiye muri White House nyuma yo gutsinda Hillary Clinton mu matora, aho yaherekejwe n’umugore we Melania, uyu na we bikaba byari byitezwe ko agirana ibiganiro byihariye na Michelle Obama.

Biteganyijwe ko Donald Trump anabonana na Perezida w’Inteko Ishinga Amategeko, Paul Ryan n’Umuyobozi wa Sena, Mitch McConnell.

Urwo rugendo rwose ararukorana na Visi Perezida Mike Pence, na we ugomba kubonana n’uwo agiye gusimbura, Joe Biden.

Donald Trump watorewe kuyobora Amerika ndetse n’umugore we Melania Trump, bahagurutse ku kibuga cy’indege cya LaGuardia muri New York mu gitondo cyo kuri uyu wa 10 Ugushyingo ahagana saa tatu n’iminota 36 berekeza mu Mujyi wa Washington, aho basesekaye ku kibuga cy’indege cya Ronald Reagan saa yine n’igice mbere yo gutangira ibiganiro.

Donald Trump wari uhagarariye ishyaka ry’aba- Républicains yegukanye intsinzi mu matora y’Umukuru w’Igihugu yabaye kuwa Kabiri tariki 8 Ugushyingo, ahigitse umu-démocrate Hillary Clinton wanahabwaga amahirwe ku majwi 279 kuri 228.

Mu mafoto Perezida Obama yakira Donald Trump

Urugendo rwa Donald Trump yerekeza muri White House


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE