Perezida Obama yigambye kuri Trump, bongera guterana amagambo

Yanditswe na Ishimwe Israel
Kuya 27 Ukuboza 2016 saa 09:08
Yasuwe :
0 0

Perezida wa Leta Zunze Ubumwe za Amerika, Barack Obama yemeza ko bitewe n’agaciro abaturage baha impinduka akomeje kubagaragariza, iyo aza kuba yemerewe kongera kwiyamamaza yari gutsinda amatora y’Umukuru w’Igihugu muri uyu mwaka.

Aya magambo Obama yagarutseho kuri uyu wa Mbere, tariki ya 26 Ukuboza 2016, mu kiganiro "The Axe Files" yagiranye n’uwahoze ari Umujyanama we Mukuru, David Axelrod, yongeye guteza umwuka mubi hagati ye na Donald Trump uheruka gutorerwa kuyobora iki gihugu.

Yagize ati “Nizeye ko mu cyerekezo mfite, iyo nza kongera kwiyamamaza nari gutsinda amatora; ndatekereza ko umubare munini w’Abanyamerika bari kunshyigikira.”

Yakomeje agira ati “Ndabizi neza kuko mu biganiro nagiranye n’abantu batandukanye mu bice by’igihugu ndetse n’abo tutabyumva kimwe, bari kuvuga ko icyerekezo cyanjye, aho mbaganisha ko ariho heza.”

CNN dukesha iyi nkuru itangaza mu kiganiro cy’iminota 50, Obama yakomeje avuga ko aba-Démocrate hari ibyo birengagije nk’umubare w’abaturage batoye ku bwinshi bituma Trump atsinda amatora.

Iki kiganiro cyagarutse ku busesenguzi bwa Obama nyuma y’amatora, kibanze ku buryo aba-Démocrate bananiwe kumvisha abaturage batuye mu bice by’icyaro umukandida bagomba gutora ndetse yongera gutunga agatoki itangazamakuru ryandikaga inkuru zibogamye kuri Clinton.

Yemeza ko mu bikorwa byo kwiyamamaza bya Hillary Clinton bitahawe agaciro imbere y’Abanyamerika batiyumvishaga inyungu zishobora kuva mu kuzahura ubukungu bw’igihugu.

Abinyujije ku rubuga rwa Twitter, Donald Trump yatangaje ko amagambo ya Obama nta shingiro afite.

Ati “ Perezida Obama yavuze ko yashoboraga kuntsinda mu matora. Agomba kubivuga ariko njye ndashimangira ko bitari gushoboka.”

Trump yongeye gukomoza ku mishinga ya Obama isa nk’iyadindiye ati “Abenshi bavuye mu kazi, umutwe w’iterabwoba wa ISIS na Obama Care" gahunda yakunze kunenga kuva agitangira ibikorwa byo kwiyamamaza.

Donald Trump yakunze kugaragaza Obama nk’udashoboye kuva yatangira ibikorwa byo kwiyamamaza, undi na we agashimangira ko atari umuyobozi ubereye Amerika.

Nyuma y’iminsi ibiri amatora abaye, Obama yakiriye Trump muri White House ndetse bombi bagaragaza ko bagiye baganira kuri telefoni kuri gahunda zitandukanye.

Perezida Obama aganira n'Uwahoze ari Umujyanama we Mukuru, David Axelrod

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza