Perezida wa Catalogne yasubitse gutangaza ubwigenge kuri Espagne

Yanditswe na Bukuru JC
Kuya 10 Ukwakira 2017 saa 10:05
Yasuwe :
0 0

Perezida w’Intara ya Catalogne, Carles Puigdemont, yatangaje kuri uyu wa Kabiri imbere y’Inteko Ishinga Amategeko ko abaye asubitse gutangaza ubwingenge bw’iyi ntara kuri Espagne, akabanza guha umwanya inzira y’ibiganiro.

Kuri uyu wa Kabiri, tariki ya 10 Ukwakira byari byitezwe ko Carles Puigdemont atangaza ubwingenge bwa Catalogne mu ijambo yagombaga kugeza ku badepite.

Ageze imbere y’Inteko Ishinga Amategeko ya Barcelone yagaragaje ko azi neza ko abaturage bari bategereje ko bitandukanya na Madrid ariko avuga ko akeneye igisubizo ko byanyura mu biganiro.

Yanakomeje avuga ko abaturage ba Espagne bose ari bamwe, bakeneye gukemura ibibazo hamwe binyuze mu nzira imwe ya demokarasi.

Nubwo yari imbere y’Inteko Ishinga Amategeko ntiyigeze yifuza ko igitekerezo cyo kudahita atangaza ubwigenge cyatorerwa.

Yavuze ko Catalogne izigenga ikaba Repuburika, byongeye abaturage bakaba barabitoreye muri kamarampaka yo kuwa 1 Ukwakira 2017 ku kigero cya 90%. Aya matora ariko ntiyitabiriwe kuko abatoye babarirwa ku kigero cya 43% cy’abagakwiye gutora.

Catalogne iri mu guhihibikanira kwigenga ariko Espagne yo irabirwanya, kimwe n’Umuryango w’Ubumwe bw’u Burayi (UE).

Minisitiri w’Intebe wa Espagne, Mariano Rajoy, yatangaje ko azakora ibishoboka byose mu kuburizamo ukwigenga kwa Catalogne.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza