Perezida Duterte azaruhuka atsinze urugamba rwo kwica abanywa ibiyobyabwenge

Yanditswe na Evariste Nsengimana
Kuya 19 Ukuboza 2016 saa 09:56
Yasuwe :
0 0

Perezida wa Philippines, Rodrigo Duterte yavuze ko intambara yo kurwanya ibiyobyabwenge izakomeza kugeza igihe umuntu wa nyuma ubigiramo uruhare akaniwe urumukwiye.

Perezida Duterte yatangaje ko azakomeza urwo rugamba igihe cyose akiri ku butegetsi kandi ko atari ikosa kwica umuntu ugerageza guhungabanya umutekano w’igihugu.

Ubwo yari agiye kugeza ijambo ku banya-Philippines baba muri Singapore, yakirijwe amashyi n’impundu.

Yagize ati “ Sinzacika intege kugeza ubwo umucuruzi w’ibiyobyabwenge wa nyuma azaba amaze gushiramo …(asa n’ugera ukuboko ku gakanu). Ntabwo byaba icyaha mvuze ko nzakwica nushaka kwangiza igihugu cyanjye.”

CNN dukesha iyi nkuru ivuga ko amagambo y’uyu Mukuru w’Igihugu yongeye kugarukwaho cyane nyuma y’uko yemeye ko yishe abantu batatu bakekwagaho gucuruza ibiyobyabwenge ubwo yari akiri Meya w’Umujyi wa Davao ndetse agashimangira ko agiye gushyira imbaraga mu kurwanya ababikoresha.

Yagize ati “I Davao, narabikoze njyewe ubwanjye, mu by’ukuri kugira ngo nereke abapolisi ko niba nshobora kubikora kuki bo batabikora.”

Abagera kuri 80 % mu batuye muri aka gace bashyigikiye Duterte bavuga ko yagize uruhare mu kugarura ituze mu gihe imyaka ishize bari barabaswe n’ibiyobyabwenge.

Kuri we, kwica abatavuga rumwe n’ubutegetsi bwe ni ukurengera abaturage.

Ati “Nabishe ndengera abaturage. Sindi umunyagitugu ngo nishe abo duhanganye kugira ngo ndambe ku butegetsi.”

Mu minsi ishize kandi yigereranije na Hitler, avuga ko yakwishimira kwica abanyabyaha n’abanywi b’ibiyobyabwenge nk’inzira rukumbi yo kurangiza ikibazo.

Yagize ati “Hitler yishe miliyoni eshatu z’Abayahudi.Ubu dufite miliyoni eshatu z’abanywi b’ibiyobyabwenge. Nakwishimira kubica bose.”

Perezida Duterte kandi yongeye kwibasira Obama avuga ko Leta Zunze Ubumwe za Amerika zimwinjirira muri politiki n’imiyoborere.

Ati “ Twamaze imyaka 50 tuyoborwa na Leta Zunze Ubumwe za Amerika. Mwihariye ubutaka bwacu murabukoresha ndetse mudutera ubwoba ko muzahagarika inkunga yacu,ariko twabaho tutanazibona. Niyo mpamvu mvuze ngo ‘Obama uzajye mu kuzimu.”

Yakomeje agira ati “ Twese ntituri abanyamuryango ba Loni? Niba hari icyo ubona kitagenda neza mu miyoborere yanjye, uzajye muri Loni utange ikirego, bizatuma uyu muryango ndetse n’indi iwushamikiyeho itangira iperereza. Hanyuma nibimara kwiganwa ubushishozi, uzazane raporo mu Nteko rusange.”

Perezida Duterte yakomeje avuga ati “ Ntuzajye umfata nk’umwana wawe. Ndi Perezida wa Repubulika ya Philippines."

Mu mezi atandatu ashize, abantu basaga ibihumbi bitandatu barishwe mu rugamba rwo guhashya ibiyobyabwenge ndetse Duterte asaba ko abantu bunganira abaregwa ibyaha by’ibiyobyabwenge bakurikiranwa na bo.

Polisi y’Igihugu muri Philippines iheruka gutangaza imibare igaragaza ko kuva kuya 1 Nyakanga, abantu 5,927 bamaze kugwa mu ntambara yo kurwanya ibiyobyabwenge.
Abarenga 2 000 bishwe mu bikorwa bya Polisi byo gushaka aho ibiyobyabwenge biherereye.

Perezida wa Philippines, Rodrigo Duterte atangaza ko azaruhuka atsinze intambara yo guca ikoreshwa ry'ibiyobyabwenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza