Trump agiye guhishura andi makuru yimbitse ajyanye n’ubujura mu matora

Yanditswe na Ishimwe Israel
Kuya 2 Mutarama 2017 saa 01:28
Yasuwe :
0 0

Donald Trump uheruka gutorerwa kuyobora Leta Zunze Ubumwe za Amerika kuwa Gatandatu tariki ya 31 Ukuboza 2016, yatangaje ko afite amakuru acukumbuye ku bijyanye n’ubujura bw’amatora bivugwa ko bwagizwemo uruhare n’u Burusiya, ndetse yizeza ko muri iki cyumweru azayashyira hanze.

Mu kiganiro yagiranye n’itangazamakuru mu birori byabaye mu ijoro ribanziriza umwaka wa 2017, i Mar-a-Lago, yakomoje ku kuba hari ikindi gihugu kitari u Burusiya cyaba cyarihishe inyuma y’umugambi wo kwinjirira amatora y’Umukuru w’Igihugu muri Amerika.

Ati “Birashoboka ko ari undi muntu wabigizemo uruhare. Mfite amakuru abandi batazi, kandi niyo mpamvu batamenya uko ibintu byagenze.”

Yakomeje agira ati “Muzabimenya kuwa Kabiri cyangwa ku wa Gatatu.”

Trump yateguye ikiganiro ku bijyanye n’ibikorwa byo kwinjirira amatora y’Umukuru w’Igihugu muri iki cyumweru, nyuma y’uko Perezida wa Amerika, Barack Obama ashyizeho ibihano ku Burusiya, igihugu ashinja kuba ku ruhembe rwo kuzambya amatora.

Ati “ Ndashaka ko bamenya amakuru y’impamo mbere yo gushinja abantu ibyaha bikomeye nk’ibi. […] Ndatekereza ko bitaba ari ibyo kugira icyo bavuga niba batabizi. Mfite amakuru menshi ku bijyanye n’ubu bujura. Rimwe na rimwe ibi bikorwa biragoye kubibonera gihamya.”

Trump ntiyakunze kuvuga rumwe n’urwego rushinzwe iperereza muri Amerika rwatangaje mu Ukwakira ko u Burusiya bwagize uruhare mu kwiba amajwi ndetse bumufasha gutsinda amatora.

Amerika iheruka gutegeka ko abadipolomate b’u Burusiya 35 ndetse n’imiryango yabo bakora muri Ambasade iherereye i Washington n’abahagarariye iki gihugu baba muri San Francisco kukivamo bitarenze kuya 1 Mutarama 2017.

CNN itangaza ko Trump nawe yashimiye Perezida w’u Burusiya, Vladimir Putin, avuga ko ari umuntu ukwiye kuko atigeze yirukana Abadipomate b’Abanyamerika baba mu gihugu cye.

Mu gitondo cyo kuri iki Cyumweru, indege itwaye Abadipolomate bari bahagarariye u Burusiya muri Amerika nibwo yahagurutse ku kibuga cy’indege cya Dulles iva i Washington.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza