Trump arashinjwa uruhare mu guhumanya uburiri Obama n’umugore we barayemo

Yanditswe na Mukaneza M.Ange
Kuya 11 Mutarama 2017 saa 12:55
Yasuwe :
0 0

Hashyizwe ahagaragara raporo ivuga ko Donald Trump uherutse gutorerwa kuyobora Leta Zunze Ubumwe za Amerika, yishyuye itsinda ry’indaya ngo zihindanye uburiri bwaraweho na Perezida Barack Obama n’umugore we muri hoteli yo mu mujyi wa Moscow mu Burusiya.

Iyi raporo yasohotse mu kinyamakuru cyitwa Buzzfeed ikubiyemo ubuhamya bwatanzwe n’uwahoze ari umukozi mu Kigo gishinzwe ubutasi mu Bwongereza (MI6).

Kubera urwango yari afitiye Obama n’umuryango we, Trump yaba yarakodesheje icyumba kiri muri hoteli Ritz Carlton, yari azi neza ko barayemo ubwo bari mu ruzinduko rw’akazi mu Burusiya, maze atumira itsinda ry’indaya zaje zikahakorera ibikorwa biteye isoni birimo no kuhanyara na we arebera.

Muri iyi raporo kandi bavuga ko kugira ngo ibyakozwe na Trump bimenyekane ari uko Ikigo cy’Ubutasi mu Burusiya cyari cyashyize muri kiriya cyumba utwuma dufata amajwi n’amashusho.

Si ibi gusa bishinjwa Trump kandi kuko ngo yaba yaranitabiriye ibirori biba birimo inzoga n’ubusambanyi (sex parties) mu mujyi wa St Petersburg, abari bahari bagahabwa ruswa ngo batavuga ibyahabereye.

Hari n’andi makuru avuga ko u Burusiya bwaba bwaragerageje guha Trump amasoko mu bijyanye n’ubucuruzi afitanye isano no kwakira igikombe cy’isi cy’umupira w’amaguru kizaba mu 2018.

Kuba u Burusiya bwari bufitanye amabanga na Trump kandi ngo biri mu byatumye inzego zabwo z’iperereza zikomeza kumuha ubufasha mu myaka itanu ishize.

Abinyujije kuri Twitter ye, Trump ubura iminsi icyenda gusa akarahirira kuyobora Amerika yahakanye ibyatangajwe muri iriya raporo aho yavuze ko ari amakuru y’ibinyoma.

Amakuru atangazwa na CNN avuga ko Ibiro bishinzwe iperereza(FBI) bigiye gusuzuma ukuri kw’ibikubiye muri iyi raporo yashyikirijwe Trump na Obama n’isano bifitanye n’ibishinjwa u Burusiya mu kwivanga mu matora ya Amerika.

Yaba umuvugizi wa FBI n’Umuyobozi w’Ikigo gishinzwe ubutasi, bombi banze kugira icyo batangaza ku bivugwa.

Trump watsinze amatora yabaye ku itariki 8 Ugushyingo 2016, ahigitse Hillary Clinton, azarahirira kuyobora Amerika ku itariki ya 20 Mutarama 2017.

Donald Trump yaba yarishyuye itsinda ry’indaya ngo zihindanye uburiri bwaraweho na Perezida Barack Obama n’umugore we mu Burusiya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza