Trump mu mazi abira ashinjwa kumena amabanga ya Leta akayasangiza u Burusiya

Yanditswe na Mukaneza M.Ange
Kuya 16 Gicurasi 2017 saa 09:27
Yasuwe :
0 0

Perezida wa Leta Zunze Ubumwe, Donald Trump, arakekwaho guha amakuru y’ibanga, Minisitiri w’Ububanyi n’Amahanga w’u Burusiya na Ambasaderi w’iki gihugu, ubwo bagiranaga ibiganiro mu cyumweru gishize.

Ikinyamakuru The Washington Post nicyo cyanditse bwa mbere inkuru ivuga ko hari amakuru y’ibanga Trump yamenye. Nyuma y’iyo nkuru abayobozi batandukanye muri Amerika bavuze ko ibyo Washington Post yanditse bifite aho bihuriye n’ukuri kuko ngo Trump yasangije Minisitiri w’Ububanyi n’Amahanga w’u Burusiya, Sergey Lavrov na Ambasaderi Sergey Kislyak amwe mu makuru y’ibanga.

Inkuru yari yatangajwe yavugaga ko Trump yabwiye Lavrov na Kislyak, uburyo umutwe wa Islamic State uteganya gukoresha mudasobwa nk’ibisasu mu ndege.

Ngo yakomeje avuga ko afite abantu bakora mu nzego z’ubutasi bamugezaho amakuru y’ibiri gukorwa byose, ariko yirinda gutangaza izina ry’umuha amakuru

Muri Mata 2017, nibwo Leta Zunze Ubumwe za Amerika zafashe umwanzuro wo gukumira mu ndege ibikoresho bitandukanye by’ikoranabuhanga birimo mudasobwa nyuma yo kumenya ko umutwe wa Islamic State ushaka kujya ubitegamo ibisasu.

Ababujijwe gutwara ibyo bikoresho ni abaturutse ku bibuga by’indege 10 byo mu bihugu umunani birimo ibyo mu Burasirazuba bwo hagati no muri Afurika.

Abayobozi mu nzego z’ubutasi babwiye CNN ko nubwo Perezida atigeze atangaza aho yakuye ayo makuru, u Burusiya buzabasha gukora ubucukumbuzi bukamenya uwayamuhaye

Ibiro bya by’Umukuru w’Igihugu byagerageje kubeshyuza iby’uko Trump yamennye amabanga y’igihugu, aho Umujyanama mu by’umutekano we, H.R. McMaster, wari muri iyo nama yatangaje ko nta kintu na kimwe kijyanye n’ubutasi kigezwe kiganirwaho ndetse ko nta n’amakuru ajyanye n’ibikorwa bya gisirikare atari asanzwe azwi yavuzwe na Trump.

Ibi kandi byanashimangiwe n’Umunyamabanga wa Leta, Rex Tillerson wavuze ko mu byaganiriwe harimo guhuza imbaraga mu kurwanya iterabwoba.

Kuba Trump avugwaho guha aya makuru u Burusiya, byatunguye bamwe mu basenateri barimo Lindsey Graham wavuze ko atigeze abimenyeshwa ndetse ko byaba ari ikibazo gikomeye biramutse ari ukuri.

Ibiganiro hagati ya Trump n’Abarusiya nabwo ubwabyo byakuruye impaka, kuko byabaye kuwa Gatatu nyuma y’umunsi umwe James Comey wari Umuyobozi Mukuru wa FBI yirukanwe, bivugwa ko yazize iperereza ku kuba iki gihugu cyarivanze mu matora ya Amerika.

Ikindi ni uko nta munyamakuru wo muri Amerika wari wemerewe kugera ahaberaga iyi nama, yabaye nyuma y’ubusabe bwa Perezida Vladimir Putin, ariko gafotozi wo mu Burusiya akaba yarashyize hanze ifoto igaragaza Trump, Lavrov na Kislyak ibitwenge ari byose.

Trump (hagati) aganira na Lavrov (ibumoso) ndetse na Ambasaderi Sergei Kislyak

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza