Trump yasabiye uwagabye igitero i New York igihano cy’urupfu

Yanditswe na Evariste Nsengimana
Kuya 2 Ugushyingo 2017 saa 09:28
Yasuwe :
0 0

Perezida wa Leta Zunze Ubumwe za Amerika, Donald Trump, yagaragaje uburakari budasanzwe aterwa n’ibikorwa by’ubwiyahuzi n’iterabwoba, asabira igihano cy’urupfu umugabo uheruka kugaba igitero i New York kigahitana ubuzima bw’abantu umunani.

Ejo kuwa Gatatu nibwo umugabo witwa Sayfullo Saipov w’imyaka 29, ukomoka mu gihugu cya Uzbekistan muri Aziya, yagaragaje inyandiko y’ubwiregure bwe ko yagabye igitero mu Mujyi wa New York, avuga ko yabikoze nyuma y’umwaka yari amaze areba amashusho agaragaza ibikorwa by’abarwanyi ba Islamic State muri Iraq.

Uyu mugabo ubu uri mu bitaro nyuma yo kuraswa urufaya rw’amasasu n’inzego z’umutekano z’Amerika, akurikiranyeho icyaha cy’ubwiyahuzi, gufasha no guha ibikoresho abarwanyi ba Islamic State.

BBC dukesha iyi nkuru yanditse ko abacamanza bavuze ko uyu mugabo yiregura imbere yabo ashize amanga ubona atewe ishema n’igikorwa yakoze, ndetse abemerera ko yari yarabiteguye mbere y’amezi abiri.

Perezida Trump abinyujije ku rukuta rwe rwa Twitter, yavuze ko nta kindi gihano kimukwiriye uretse kwicwa. Ati “Uriya mwiyahuzi wagabye igitero i New York ubwo yasabwaga kumanura ibendera rya Islamic State mu cyumba arwariyemo yari yishimye. Yishe abantu umunani akomeretsa abandi 12. Akwiriye guhabwa igihano cy’urupfu.”

Nubwo Trump yasabiye uyu mugabo kwicwa, iki gihano kuva mu 2004 ntabwo kigitangwa muri Leta ya New York iki cyaha cyakorewemo ahubwo nahamwa n’ibyaha ashobora kuzafungwa burundu.

Uretse iki gihano kigaragaza ko Perezida Trump yarakajwe bikomeye n’iki gitero, yanabwiye abanyamakuru ko agiye gushakisha uko kwemerera abanyamahanga gutura muri Amerika binyuze muri gahunda ya “Green Cards” byarangira.

Ati “Ngiye gutangira uburyo bwo gukuraho kwemerera gusaba gutura muri Amerika. Tugomba gukora ikintu cyiza kandi kirengera abaturage bacu. Turashaka ko ubu buryo bukurwaho mu gihe cya vuba.”

Ubu buryo agiye gukuraho, bumaze imyaka isaga 27 bukoreshwa n’abatari bake aho byibuze buri mwaka abanyamahanga barenga ibihumbi 50 bahabwaga uburenganzira bwo gutura muri Amerika.

Si ubwa mbere Trump agaragaje ko ashaka gufungira inzira abimukira bagana muri Amerika, ni igitekerezo atahwemye gushyira imbere kuva yatangira kwiyamamariza kuyobora iki gihugu cy’igihangange ku Isi, aho avuga ko byagira uruhare mu gukingira abaturage ibikorwa by’ubwiyahuzi.

Trump yavuze ko Saipov akwiye kwicwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza