Trump yasabwe gutanga amajwi yaba yarafashe Comey

Yanditswe na Mukaneza M.Ange
Kuya 15 Gicurasi 2017 saa 07:36
Yasuwe :
0 0

Nyuma yo kwirukanwa kwa James Comey wari Umuyobozi Mukuru w’Ibiro bishinzwe iperereza, FBI, bamwe mu bagize Inteko Ishinga Amategeko basabye Perezida wa Leta Zunze Ubumwe za Amerika, Donald Trump, gutanga amajwi yaba yaramufashe mu biganiro bagiye bagirana.

Mu ntangiriro z’icyumweru gishize nibwo Trump yafashe umwanzuro wo kwirukana Comey, mu mpamvu yatanze hakaba harimo ko atari agifite ubushobozi bwo kubahiriza inshingano ze uko bikwiye.

Senateri Charles Schumer, uturuka mu ishyaka ry’Aba- démocrate yavuze ko Trump aramutse yangije amajwi yafashe Comey, kwaba ari ukwica amategeko.

Ati “Niba nta n’amajwi ahari agomba gusaba imbabazi Jim Comey, n’Abanyamerika bose kubera ko yatanze amakuru abayobya.”

Senateri Lindsey Graham wo mu Ishyaka ry’aba- républicain we asanga Ibiro bya Perezida, White House bikwiye gukura abantu mu rujijo, bigasobanura niba ayo majwi koko ahari.

Ibi aba senateri babivuze nyuma y’aho Trump yanditse kuri Twitter asa n’utera ubwoba Comey.

Ati “James Comey, wizere ko nta majwi y’ibiganiro twagiranye mbere y’uko utangira kuvugana n’itangazamakuru.”

White House ntiyigeze yemeza cyangwa ngo ihakane ko ayo majwi yaba ahari.

Mu kiganiro yagiranye na CNN, Schumer yavuze ko abasenateri b’aba- démocrate batazemera gutora umuyobozi mushya wa FBI, igihe cyose hatarashyirwaho Umushinjacyaha wihariye ugomba gukora iperereza ku kuba u Burusiya bwarivanze mu matora ya Perezida muri Leta Zunze Ubumwe za Amerika.

Aba-démocrate bashinja Trump kwirukana Comey kubera ko FBI yari iri gukora iperereza ku mubano hagati y’itsinda ryamamaje Trump n’u Burusiya.

Senateri Graham we yagaragaje ko amagambo yanditswe na Trump kuri Twitter atari akwiriye ndetse umusaba kuva mu nzira akareka iperereza rigakomeza.

Muri iki cyumweru nibwo hagomba gutangazwa uzasimbura Comey, akazatoranywa mu bantu 11 batangiye guhatwa ibibazo na sena ku wa gatandatu barimo Umuyobozi w’agateganyo wa FBI, Andrew McCabe.

Trump yasabwe gutanga amajwi yaba yarafashe Comey

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza