Trump yashimangiye ko miliyoni eshatu z’ababa muri Amerika nta byangombwa bazirukanwa

Yanditswe na Philbert Girinema
Kuya 14 Ugushyingo 2016 saa 09:02
39 26

Donald Trump uherutse gutorerwa kuyobora Leta Zunze za Amerika yatangaje ko mu mishanga afite harimo gusubiza ku ivuko abimukira bagera kuri miliyoni eshatu batagira ibyangombwa bakoze ibyaha bitandukanye.

Trump ubarizwa mu ishyaka ry’aba- républicain yatsinze amatora ku itariki ya 8 Ugushyingo 2016 ahigitse Hillary Clinton bari bahanganye.

Mu kiganiro 60 Minutes gitambuka kuri CBC ku Cyumweru, Trump yashimangiye ko azashyira mu bikorwa ibyo yavuze yiyamamaza birimo kwirukana abimukira batagira ibyangombwa no kubaka urukuta ku mupaka wa Mexique na Amerika.

Ati “Icyo tuzakora ni ugufata abantu b’abanyabyaha kandi bafite ibyemeza ko bigeze gukatirwa n’inkiko, ababarizwa mu matsinda akora urugomo, abacuruza ibiyobyabwenge, aho benshi muri abo bantu bagera kuri miliyoni ebyiri, bashobora no kuba ari miliyoni eshatu; tuzabirukana mu gihugu cyacu cyangwa tubafunge. Oya ariko tuzabirukana mu gihugu cyacu, bari hano mu buryo bunyuranyije n’amategeko.”

Ntiyigeze ariko asobanura icyo azakorera abandi bimukira badafite ibyangombwa babarirwa hagati ya miliyoni icyenda n’icumi, ahubwo avuga ko ubwo umupaka uzaba umeze neza, ibintu bimaze gusubira ku murongo bazatangira kwiga ku cyakorwa.

Trump yavuze ibi mu gihe mu kiganiro na CNN, Perezida w’Inteko Ishinga Amategeko, Paul Ryan yari yagerageje kurema agatima abaturage ku bijyanye no kwirukana abimukira ndetse n’izindi gahunda za Trump ku bijyanye n’abinjira n’abasohoka.

Ku bijyanye n’umupaka wa Mexique na Amerika ahasanzwe hubatse urukuta rurerure, ahandi hakaba hari harindishijwe umuriro w’amashanyarazi n’abantu, hari n’igice cy’ubutayu ariko kitarinzwe kuko abayobozi basanga nta mpamvu yo gutuma hafungwa; Trump yashimangiye gahunda ye yo kuhubaka urukuta.

Ubwo yiyamamazaga, yavuze ko azubaka urukuta kuri uyu mupaka, ariko bikishyurwa na Leta ya Mexique kuko ituma muri Amerika hinjira abanyabyaha.

Ibi ariko Mexique yabyamaganiye kure ivuga ko idateze gutanga amafaranga ku iyukabakwa ry’uru rukuta kuko ari ukubangamira urujya n’uruza rw’abantu.
Raporo yakozwe mu 2014 igaragaza ko abimukira bagera ku bihumbi 200 badafite ibyangombwa bari barakatiwe n’inkiko basubijwe mu bihugu bavukamo.

Trump yashimangiye ko miliyoni eshatu z’ababa muri Amerika nta byangombwa bazirukanwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE