Kwamamaza

Trump yateje impungenge ko ashobora kutemera ibizava mu matora natsindwa na Clinton

Yanditswe kuya 20-10-2016 saa 12:34' na Rabbi Malo Umucunguzi


Donald Trump uri guhatanira kuyobora Leta Zunze Ubumwe za Amerika, yanze kwerura niba azemera ibizava mu matora y’Umukuru w’Igihugu, igihe byazatangazwa ko atsinzwe na Hillary Clinton bahanganye, biteza impungenge ko hashobora kuvuka amatati ashingiye ku matora, amaze ibinyejana bisaga bibiri atarangwa muri Amerika.

Kuri uyu wa Gatatu tariki 19, nibwo aba bakandida bombi bakoze ikiganiro mpaka cya gatatu ari nacyo cya nyuma, kibanziriza amatora rusange ateganyijwe kuwa 8 Ugushyingo, ikiganiro cyabereye muri Kaminuza ya Nevada mu Mujyi wa Las Vegas.

CNN yatangaje ko Chris Wallace wari ukiyoboye yabajije Trump niba azemera ibyavuye mu matora, nyuma y’uko yavuze ko amatora ari kubogamira ku ruhande rutari urwe, ndetse abanza kumugaragariza ko Amerika imaze igihe igira ihererekanya ry’ubutegetsi mu ituze.

Yasubije ati "Nzabirebaho muri icyo gihe. Icyo ndi kuvuga ni uko nzababwira muri icyo gihe. Ndabarekera mu gihirahiro.’’

Ni amagambo yatumye Hillary Clinton avuga ko Trump ashobora kurenga ku mahame amaze igihe kirekire aranga politiki muri Leta Zunze Ubumwe za Amerika, harimo ihererekanya ry’ubutegetsi mu ituze, uwatsinzwe ntaruhanye.

Clinton yagize ati "Kuriya ntabwo ariko demokarasi yacu iteye, tumaze imyaka ikabakaba 240. Twagiye tugira amatora aboneye kandi akaba mu ituze. Twagiye twemera ibiva mu matora nubwo tutashoboraga kubyishimira. Ni nabyo biba byitezwe ku muntu uri mu kiganiro mu matora rusange.’’

Icyizere ku itorwa rya Trump cyakomeje kugenda kigabanuka mu minsi ishize, ubwo hajyaga hanze amashusho avuga amagambo atarashimishije benshi, harimo uko yashatse kuryamana n’umugore. Ni amagambo yafashwe nk’agayitse.

Ni ikiganiro cyaranzwe no kuvugira hejuru no gucana hagati mu ijambo, ndetse aba bakandida ntibahanye umukono haba mbere y’ikiganiro cyangwa mu kugisoza.

Muri ibi biganiro, Trump yavuze ko natorwa azashyiraho abacamanza mu Rukiko rw’Ikirenga bazakuraho itegeko ryemeje gukuramo inda, ndetse anasigasire uburenganzira bwo gutunga imbunda.

Yanagarutse ku isezerano yatanze kuva mbere, ko abimukira badafite ibyangombwa bagomba kwirukanwa ndetse akazarinda imbibi za Leta Zunze Ubumwe za Amerika.

Clinton yavuze ko we azarengera ababana bahuje ibitsina, aharanire uburenganzira bwo gukuramo inda, aharanire iterambere ry’abaturage baciriritse ndetse n’abagore bahembwe mu buryo bungana n’abandi.

Muri ibi biganiro kandi, aba bakandida bombi bagarutse ku mubano uvugwa hagati ya Vladmir Putin w’u Burusiya, bivugwa ko ashyigikiye ko Trump yatorwa.

Ikiganiro cyaranzwe no gucana mu ijambo cyamaze iminota 90

Umunyemari Trump yagize ati “Ntabwo nzi Putin”, ariko yongera ho ko uyu muyobozi w’u Burusiya nta cyubahiro aha Clinton.

Hillary Clinton nawe yahise azamukiramo agaragaza ko Putin yifuza ko Amerika yayoborwa na Trump nk’umuyobozi u Burusiya bwazaba bwigenzurira.

Ati “Ni uko yifuza ko Leta Zunze Ubumwe za Amerika zigira umuyobozi w’igipupe.’’ Clinton yakomeje amushinja kugendera mu byifuzo bya Putin.

Mu igenzura ryakozwe nyuma y’ibi biganiro na CNN, ryagaragaje ko 52% by’ababirebye baha amahirwe Clinton, 39% bagasigara kuri Trump. Imyitwarire ya Trump kuri uyu wa Gatatu yakemanzwe ko ashobora kunanirwa no kwigarurira imitima y’abatora bataremezwa n’uruhande na rumwe.

Ikiganiro mpaka cya nyuma hagati ya Trump na Clinton cyabereye muri Kaminuza ya Nevada
Clinton yanenze Trump ushaka gukorera mu kwaha kwa Putin
Trump avuga niba azemera ibizava mu matora yagize ati "Nzabirebaho muri icyo gihe"
Umugabo wa Hillary Clinton, Bill Clinton, yari yitabiriye iki kiganiro atera ingabo mu bitugu umugore we
Clinton na Trump ntibigeze bakorana mu ntoki mbere na nyuma y'ikiganiro

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved