Trump yitambitse umugambi wa Obama wo gufunga Gereza ya Guantanamo

Yanditswe na Evariste Nsengimana
Kuya 4 Mutarama 2017 saa 10:47
Yasuwe : XX
0

Perezida uheruka gutorerwa kuyobora Leta Zunze Ubumwe za Amerika, Donald Trump yasabye ko ibikorwa byo kwimura imfungwa zo muri Gereza ya Guantanamo nk’uko Perezida Barack Obama uri gusoza manda yabyiyemeje byahagarara.

Obama usigaje iminsi 16 akava ku butegetsi yihaye inshingano ko manda ye izarangira nta mfungwa n’imwe ikiri muri Gereza ya Guantanamo.

Kuri ubu iyi gereza isigayemo imfungwa zisaga 60, muri abo 1/3 nibo bahanaguweho ibyaha.

Abinyujije ku rukuta rwe rwa Twitter kuri uyu wa Kabiri tariki ya 3 Mutarama 2017, Trump yasabye ko nta mfungwa yongera kuvanwa muri gereza ya Guantanamo.

Ati “Ntihagire imfungwa ivanwa i Guantanamo, bariya ni abantu babi bashobora kongera guteza intambara.”

Washington Post yanditse ko Trump yabivuze nyuma y’itangazo rivuga ko hagiye kwimurwa izindi mfungwa 20 mbere y’uko Obama ava ku butegetsi.

Umunyamabanga w’Ibiro by’Umukuru w’Igihugu , Josh Earnest n’abandi bayobozi ba Amerika bavuze ko ibyo Trump asaba bidahindura icyemezo cyafashwe.

Gereza ya Guantanamo ifungiyemo abasirikare bakoze ibyaha by’intambara bafashwe nyuma y’ibitero by’iterabwoba byo mu 2001.

Imiryango Iharanira Uburenganzira bw’Ikiremwamuntu yakomeje gusaba ko iyi gereza yafungwa. Umuyobozi ushinzwe umutekano w’igihugu mu muryango uharanira uburenganzira bwa muntu, Raha Wala, ati “yavuze ko azabikora (Obama) kandi twiteguye ko azabigeraho.”

Mu Ugushyingo 2016, Robert Chesney, umwarimu mu by’amategeko muri Kaminuza ya Texas yavuze ko Trump ashobora kuba ateganya gukomeza gukoresha iriya gereza afungiramo bamwe mu bazafatwa mu bihugu bya Iraq na Syria bakorana n’Umutwe w’Iterabwoba wa Islamic State.

Guantanamo yari ifungiyemo abasaga 680 kuva 2003 baza kugera kuri 240 mu 2009 Obama amaze kujya ku butegetsi.

Kuri ubu hasigayemo 60. Bamwe nta bimenyetso bigaragaza ko bagomba gufungirwa muri iyo gereza kuko hari ibyaha baregwa biburanishwa n’inkiko za gisivili bikaba n’imbogamizi ku kwimurirwa mu zindi gereza. Abasaga 200 bimuriwe muri Afghanistan.

Trump yasabye ko imfungwa ziri muri gereza ya Guantanamo zitakongera kurekurwa
Ubutumwa bwa Donald Trump kuri twitter
Icyemezo cya Obama cyo kuva ku butegetsi afunze iyi gereza gishobora gukomwa mu nkokora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza