Turikiya igiye gukora impinduka zikomeye ikuraho amashuri y’ibya gisirikare

Yanditswe na Philbert Girinema
Kuya 31 Nyakanga 2016 saa 11:17
Yasuwe :
0 0

Turikiya irateganya gufunga amashuri yose ya gisirikare hanyuma hagashingwa kaminuza imwe izaba yigisha amasomo ajyanye no gucunga umutekano ndetse inzego z’iperereza mu gihugu nazo zamburwe ububasha ahubwo zijye zigendera ku mabwiriza ya Perezida.

Perezida wa Turikiya, Recep Tayyip Erdoğan, yabitangaje nyuma yo kwirukana abasirikare basaga 1700 barimo n’abajenerali 149 bazira gukekwaho kugira uruhare mu gikorwa cyo gushaka guhirika ubutegetsi giherutse gupfuba muri icyo gihugu tariki ya 15 Nyakanga 2016.

Ari kuri televizizo A Haber ku wa Gatandatu tariki ya 30 Nyakanga 2016, yavuze ko inzego nkuru z’igisikare n’iz’iperereza azajya azigenzura agamije kongerera imbaraga ubutegetsi bw’igihugu nyuma yo kurokoka umugambi wo guhirika ubutegetsi.

Yagize ati “Tugiye gutangiza impinduka nto mu Itegeko Nshinga, nibyemerwa zizatangirira mu nzego z’iperereza ndetse n’iz’ubuyobozi bw’ingabo zizajya zigenzurwa n’Ibiro by’Umukuru w’Igihugu.”

Ibyo yasabye bizemezwa mu gihe bitowe na bibiri bya gatatu by’Abadepite bagize Inteko Ishinga Amategeko y’icyo gihugu. Ni muri urwo rwego Perezida Erdogan aherutse kubonana n’amashyaka abiri atavuga rumwe n’ubutegetsi bwe, ashakisha uburyo Abadepite bayo bazashyigikira leta ye mu gutora icyo cyifuzo cye nkuko byatangajwe na Minisitiri w’Intebe Binali Yildirim.

Umugambi wo guhirika ubutegetsi wapfubye muri Turikiya waguyemo abasaga 270, guhera uwo munsi hatangizwa ibihe bidasanzwe bizamara amezi atatu. Mu bindi byemezo Perezida Erdogan yafashe, harimo kugabanya umubare w’abajandarume, abasigaye akabongerere intwaro zikomeye.

Ibyo bibazo byatumye abakozi ba leta basaga ibihumbi 66 bavanwa ku kazi, pasiporo zisaga ibihumbi 50 nazo zamburwa agaciro, muri Minisiteri y’Umurimo naho abakozi 1300 barimo gukorwaho iperereza.

Leta ya Turikiya yamaze guhagarika ibinyamakuru byinshi mu gihugu, birimo 45 byandika ndetse na televiziyo 16. Muri iki cyumweru ni nabwo yashyize hanze impapuro zo guta muri yombi abanyamakuru 42, muri bo 16 bakaba bari mu maboko ya Polisi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza