U Buhinde: Abantu 95 baguye mu mpanuka ikomeye ya Gariyamoshi

Yanditswe na Uwishyaka Jean Louis
Kuya 20 Ugushyingo 2016 saa 11:33
Yasuwe : XX
0

Abantu 95 bapfuye, abandi benshi bakomerekera bikomeye mu mpanuka ya Gariyamoshi yabereye mu Majyaruguru ashyira u Burasirazuba bw’u Buhinde hafi y’Umujyi wa Kanpur.

Iyi mpanuka yabaye mu ma saa cyenda zo mu rukerera kuri iki cyumweru, ubwo iyo gariyamoshi (Patna-Indore Express) ikorera ingendo mu duce twa Tatna na Indore two muri iki gihugu, yarengaga umuhanda, maze abagenzi 95 mu bari bayirimo bitaba Imana abandi barenga 150 barakomereka.

Umuvugizi wa Mnisiteri ifite mu nshingano gutwara abantu n’ibintu muri Gariyamoshi mu Buhinde, Anil Saxena, yabwiye CNN ko umubare w’abakomerekeye muri iyi mpanuka ushobora kugenda wiyongera.

Amakuru aturuka muri iki gihugu, avuga ko muri abo bantu bakomerekeye muri iyo mpanuka, 40 bakomeretse bikomeye.

Umuyobozi wa Polisi mu mujyi wa Uttar Pradesh, Javeed Ahmed yavuze ko kugeza ubu bataramenya icyateye iyo mpanuka ndetse ko n’umubare nyakuri w’abagenzi bari muri iyo gariyamoshi utaramenyekana.

Gusa ariko yavuze ko hashobora kuba hari abandi bantu 70 baheze muri tumwe mu duce tw’iyi gariyamoshi.

Minisitiri w’Intebe w’u Buhinde, Narendra Modi, abinyujije ku rukuta rwe rwa Twitter yihanganishije imiryango y’ababuriye ababo muri iyi mpanuka.

Uburyo bwo gutwara abantu n’ibintu muri gariyamoshi muri iki gihugu, ngo ni bwo bukoreshwa cyane n’abagituye, gusa ngo zikunda kwibasirwa n’impanuka buri mwaka, bigakekwa ko zidakorerwa igenzura mu buryo bukwiye.

Iyi mpanuka ya gariyamoshi yahitanye abantu 95 bari bayirimo
Bamwe mu barokotse iyi mpanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza