Kwamamaza

U Buhinde: Umwuzukuru wa Mahatma Gandhi yitabye Imana akennye cyane

Yanditswe kuya 10-11-2016 saa 21:08' na Jean Pierre Tuyisenge


Kanubhai Ramdas Gandhi, Umwuzukuru wa Mahatma Gandhi ufatwa na benshi nk’umubyeyi w’igihugu cy’u Buhinde, yitabye Imana ku wa mbere w’iki cyumweru azize indwara.

Uyu mukambwe utabarutse ku myaka 87, yahoze akorera Ikigo cy’Abanyamerika gikora ubushakashatsi ku bumenyi bwo mu kirere n’isanzure, NASA, yaguye mu ivuriro rito ryo mu Mujyi wa New Delhi muri icyo gihugu aho atashoboraga no kwiyishyurira amafaranga y’ibitaro.

Ni ibintu byateye agahinda benshi kubura umuntu wagize izina rizwi cyane mu Buhinde ndetse akanaba n’umuherwe mu gihe cy’Imyaka 25 yamaze akora nk’umushakashatsi ukomeye mu kigo cya NASA.

Muri abo harimo Minisitiri w’Intebe w’u Buhinde, Narendra Modi, abinyujije ku rukuta rwe rwa Twitter yatangaje ko bababajwe n’urupfu rwa Kanubhai Gandhi, umwuzukuru wa Ghandi, akavuga ko yibuka ibiganiro bagiye bagirana.

CBCNews yanditse iyi nkuru ivuga ko Kanubhai Gandhi ari umwana w’umuhungu wa gatatu wa Mahatma Gandhi witwa Ramdas. Ifoto yamenyekanyemo ni aho mu bwana bwe yari afashe akabando ayoboye Sekuru mu myigaragambyo yiswe Salt Satyagraha igamije kwamagana abakoloni b’Abongereza, yabereye mu Mujyi wa Mumbai mu 1930.

Iyo myigaragambyo yayobowe na Mahatma Gandhi, yamaganaga umusoro uhanitse ku munyu wabaga winjijwe mu gihugu mu gihe uwabo bari barawimweho uburenganzira n’Abakoloni b’Abongereza.

Muri Leta Zunze Ubumwe za Amerika yahamaze imyaka igera kuri 40, aho yamenyekanye nk’umuhanga mu bya Siyansi, byatumye mu 1961, uwahoze ari Ambasaderi wa Amerika mu Buhinde, John Kenneth Galbraith, amwohereza kwiga muri Kaminuza y’ikoranabuhanga ya Massachusetts (MIT). Nyuma y’amasomo ye, yakoreye ikigo cya NASA, na Minisiteri y’Ingabo ya Amerika aho yitaga ku miterere y’indege z’intambara.

Umugore we Shivalaxmi ukiriho kugeza ubu, wahoze wigisha muri kaminuza ikora iby’ubushakashatsi mu buvuzi ya Boston, mu ntangiriro z’uyu mwaka yabwiye ikinyamakuru cyo mu Buhinde (Hindu) ko babanye mu buzima bwiza.

Ati “ Twabaye mu buzima bushimishije, twatumiwe mu birori byinshi, twabagaho mu buzima bwiza, ariko dore ubu turi hano.”

Shivalaxmi, avuga ko gufata icyemezo cyo kuva muri Amerika nyuma y’imyaka 40 bakajya kwibera mu Buhinde ari inkuru ndende.

Uyu muryango utagiraga umwana, wasubiye mu Buhinde mu mwaka wa 2014, ubanza kuba mu nzu z’abihayimana ziherereye mu gace kitwa Gujarat, muri Gicurasi uyu mwaka wimukiye mu zubakiwe abasaza mu Mujyi wa New Delhi.

Inshuti y’umuryango wa Gandhi yitwa Dhimant Badhia, yagerageje gukusanya amafaranga yo kumuvuza indwara ya ’paralysie’ yamufashe nyuma gato y’ibibazo by’umutima yari yagize. Kuva izo ndwara zamufata, abanyapolitiki benshi baramusuye, banamuha amafaranga, gusa ubwo bufasha yabumazemo icyumweru kimwe ahita atabaruka.

Kanubhai Ramdas Gandhi yitabye Imana azize indwara
Ifoto ye izwi n'abantu benshi n'iyafashwe mu bwana bwe ari kumwe na Sekuru mu myigaragambyo yamaganaga Abakoloni

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved