U Burayi bwanze gushinja iterabwoba umuryango ufitanye isano n’ikigo cyafunzwe mu Rwanda

Yanditswe na Herve Ugirumukunda
Kuya 4 Ukuboza 2017 saa 02:59
Yasuwe :
0 0

Umuryango w’Ubumwe bw’u Burayi, EU, witandukanyije na Leta ya Turikiya ku bijyanye n’Umuryango witwa FETO wari ufite ishuri rya Hope Kids Academy ryafunzwe mu Rwanda ku mpamvu zifitanye isano na kudeta yo guhirika Perezida Recep Tayyip Erdoğan.

FETO ni ihuriro rya Kiyisilamu riyobowe na Muhammed Fethullah Gülen, umwigisha ukomeye muri iri dini umaze imyaka 18 aba mu buhungiro muri Leta Zunze Ubumwe za Amerika.

Reuters yatangaje ko Umuyobozi wa EU ushinzwe kurwanya iterabwoba, Gilles de Kerchove, yasabye Turikiya ibimenyetso bifatika byemeza ko (FETO) ifite aho ihuriye n’ibikorwa by’iterabwoba.

Leta ya Turikiya ishinja Gülen kuyobora kudeta yapfubye mu mwaka ushize yatumye abantu basaga 250 bapfa. We yarabihakanye ndetse anamagana abayikoze.
Muri Gicurasi, Minisiteri y’Uburezi yafunze ishuri rya ‘Hope Academy’ ryagenzurwaga n’abanya-Turikiya bafite aho bahuriye na FETO.

Itangazo yashyize ahagaragara ryagiraga riti “Hashingiwe ku busabe bwa Guverinoma ya Turikiya yasabye Guverinoma y’u Rwanda ko iryo shuri ryagengwa na Turkish Foundation, hanarebwe n’ibibazo bishobora guturuka kuri uwo mwanzuro; mu gushyira mu bikorwa Itegeko Ngenga nimero 02/2011/OL ryo ku wa 27/07/2011 rigena imiterere y’uburezi by’umwihariko mu ngingo yaryo ya 14 igena uruhare rwa Guverinoma y’u Rwanda.”

“Guverinoma y’u Rwanda yafashe umwanzuro wo gufunga Hope Academy Rwanda iherereye mu Mudugudu wa Ntora, Akagari ka Ruhango, Umurenge wa Gisozi, Akarere ka Gasabo.”

Umugambi wo guhirika ubutegetsi bwa Perezida Erdoğan wageragejwe ku ya 15 Nyakanga 2017, bikorwa n’abasirikare bigometse ku butegetsi bwe bashaka kwigarurira Umurwa Mukuru Ankara ndetse n’Umujyi ufatwa nk’uw’ubukerarugendo, Istanbul ku wa 15 Nyakanga 2016.

Turikiya yakunze gushinja inshuti zayo zirimo ibihugu by’u Burayi na Leta kutamagana iyo kudeta bihagije ahubwo bigahangayikishwa no gukurikirana abayikoze.

De Kerchove yagize iti “Ihuriro rya Fetullah (FETO) ntabwo turibona nk’umutwe w’iterabwoba kandi ndumva EU itazahindura imitekerereze yayo vuba. Mukeneye ibimenyetso simusiga.”

Turikiya yafunze abantu babarirwa mu bihumbi 50 barimo abarimu, abapolisi, abasirikare, abanyamakuru n’abakozi ba Ambasade ya USA bafite aho bahuriye n’Ihuriro rya Gülen.

Abandi 150 000 barirukanwe banahagarikwa mu kazi bazira gukekwaho gukorana n’uyu mugabo.

Hari n’abafungiwe gutunga ‘ByLock’, Porogaramu ya telefoni Guverinoma ya Turikiya ivuga jo yakoreshwaga n’abashaka guhirika ubutegetsi, abandi bafungiwa guhamagara abayifite.

Muhammed Fethullah Gülen ashinjwa kuba inyuma y'umugambi wo guhirika ubutegetsi muri Turikiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza