U Bushinwa: Hatangijwe imirimo y’Inteko ishobora gusiga Jinping yemerewe kuguma ku butegetsi

Yanditswe na Mukaneza M.Ange
Kuya 5 Werurwe 2018 saa 07:08
Yasuwe :
0 0

Nyuma y’aho ishyaka riri ku butegetsi mu Bushinwa ritangiye gusaba ko hakurwaho umubare wa manda za perezida, Inteko Ishinga Amategeko y’iki gihugu (NPC, National People’s Congress), kuri uyu wa Kabiri yatangiye imirimo yayo aho iki cyifuzo giha Xi Jinping amahirwe yo gukomeza kuyobora cyahawe umwanya munini.

Abadepite bagera ku 3000 baturutse mu gihugu hose nibo biteganyijwe ko bitabira imirimo y’Inteko izamara ibyumweru bibiri ibere mu Mujyi wa Beijing, igikorwa kigaragaza ubumwe ndetse cyitezweho gusiga amategeko yemejwe ndetse n’ibyemezo byinshi bifashwe.

CNN dukesha iyi nkuru ivuga ko imirimo y’Inteko muri uyu mwaka izibanda ku gusuzuma ibijyanye no gukura umubare wa manda za perezida mu Itegeko Nshinga, igikorwa kizatuma Jinping akomeza kuyobora na nyuma ya 2023 ndetse akagira ububasha buruta ubw’undi muyobozi wabayeho mu Bushinwa nyuma ya Mao Zedong washinze iki gihugu.

Ku wa 25 nibwo ishyaka ry’Aba-Communiste ryashyize ahagaragara amavugururwa ryifuza ko yakorwa ku Itegeko Nshinga u Bushinwa bugenderaho kuva mu 1982. Mu byo bifuza ko bihinduka harimo gukuraho umubare wa manda ebyiri z’imyaka itanu perezida yamaraga.

Jinping usanzwe ari we muyobozi urusha abandi ububasha mu Bushinwa, ni na we uyobora ishyaka riri ku butegetsi n’igisirakare, imyanya na yo ikomeye cyane kurusha kuba perezida kandi itagira manda.

Umuvugizi wa NPC, Zhang Yesui, yavuze ko guhindura Itegeko Nshinga bizatanga umusanzu mu gukomeza gusigasira no kugira ubutegetsi bw’ishyaka ryunze ubumwe, barangajwe imbere na Xi Jinping ndetse no kurushaho kunoza ibijyanye n’imiyoborere mu Bushinwa. Tariki ya 11 Werurwe ni bwo hazaba amatora yemeza aya mavugurura.

Mu bindi byitezwe muri iyi Nteko rusange ni ukuba Wang Qishan uzwi cyane mu kurwanya ruswa aho yafatanyije na Jinping mu guta muri yombi abasaga miliyoni imwe, ashobora guhabwa umwanya wa Visi Perezida, udasanzweho ahubwo uzatangazwa bwa mbere tariki ya 17 Werurwe.

Nubwo kwemezwa kwa Wang w’imyaka 69 bitaba bitunguranye ariko, byaba bitangaje kubona umuntu ahawe umwanya ukomeye mu leta y’u Bushinwa kandi atari muri komite y’Abayobozi bakomeye muri iki gihugu (Politburo Standing Committee), kuko yayivuyemo ubwo yuzuzaga imyaka 68.

Hazanatorwa kandi itegeko rishyiraho Ikigo gishizwe kurwanya ruswa ndetse n’irishyiraho Komisiyo y’ubugenzuzi bw’imikorere y’inzego za leta (National Supervision Commission).

Jinping usanzwe ari we muyobozi urusha abandi ububasha mu Bushinwa, ni na we uyobora ishyaka riri ku butegetsi n’igisirakare

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza