U Bwongereza bushobora kwisanga burushwa n’u Rwanda kwishyikira muri EU

Yanditswe na Mukaneza M.Ange
Kuya 13 Werurwe 2017 saa 09:53
Yasuwe :
1 0

Ibiro bishinzwe Imari mu Bwongereza byaburiye Leta ko mu gihe igihugu cyaba kivuye mu Muryango w’Ubumwe bw’u Burayi, EU, hatabayeho amasezerano afatika arebana n’ubucuruzi, gishobora kwisanga kirushwa n’ibihugu birimo n’u Rwanda kwishyikira muri uyu muryango.

Muri Kamena 2016, nibwo binyuze muri kamarampaka, abaturage b’u Bwongereza batoye umwanzuro wo kuva muri EU, urugendo ruzwi nka Brexit.

Inyandiko zitarashyirwa hanze ariko The Independent yabashije kubona, zigaragaza ko kuba Minisitiri w’Intebe, Theresa May yishingikirije Umuryango Mpuzamahanga w’Ubucuruzi (WTO), igihe Brexit yaba itagenze neza ngo bishobora kugira ingaruka mbi ku bukungu bw’u Bwongereza.

Raporo y’amapaji 36, igaragaza ko ibi bizagira ingaruka zikomeye ku bigo by’ubucuruzi, imirimo ndetse n’ibiciro by’ibiribwa, koroherezwa igihe abaturage bakoresha telefoni zabo mu bihugu bigize EU (Roaming), guhabwa indishyi igihe bakerejwe mu ngendo z’indege n’ibindi.

U Bwongereza kandi ngo bushobora gukurirwaho amahirwe yo kohereza ibicuruzwa byabwo ku buntu mu bihugu 53 biri muri WTO, byari bisanzwe bifitanye amasezerano y’ubucuruzi na EU.

Iyi raporo ivuga ko ibicuruzwa bikomoka ku buhinzi, u Bwongereza bwoherezaga muri EU bishobora gushyirirwaho imisoro mishya ku mpuzandengo ya 14.4%, mu gihe ibidakomoka ku buhinzi byo bishobora gushyirwa kuri 4.3%; ibi bikaba bishobora gusubiza inyuma ubucuruzi bw’iki gihugu.

Igira iti “U Bwongereza bushobora kurushwa amahirwe yo kugera ku isoko rimwe rya EU na Pakistan, u Rwanda cyangwa Yemen. EU izakorana ubucuruzi n’u Bwongereza ku mabwiriza amwe nk’ay’ibihugu nk’u Bushinwa.”

U Rwanda rwamaze gushyira umukono ku masezerano ya ‘Economic Partnership Agreement-EPA’, ahuza ibihugu byo mu Karere ka Afurika y’Iburasirazuba (EAC) na EU, afatwa nk’azoroshya ubucuruzi n’ubufatanye mu iterambere hagati y’iyi miryango yombi, harimo no gukuraho imisoro ku bicuruzwa bikorerwa mu bihugu biyigize.

Kuba amabwiriza WTO igenderaho amaze imyaka isaga 20, ngo ntabwo ashobora guhura n’ibyo ubukungu bw’u Bwongereza bukeneye ngo bubashe gutera imbere.

Kugira ngo EU ibashe korohereza u Bwongereza mu bucuruzi kandi, byasaba ko uyu muryango ugabanyiriza ibiciro ibihugu byose bigize WTO uko ari 182.

Nubwo Umuvugizi w’Ibiro bishinzwe imari yanze kugira icyo avuga kuri iyi raporo, abadashyigikiye ko Brexit yihutishwa bo batangiye kuyikoresha basaba abaminisitiri gutabara iki gihugu kitarajya mu kaga, Inteko Ishinga Amategeko akaba ariyo ifata umwanzuro wa nyuma ku mubano w’u Bwongereza na EU.

Ni mu gihe abandi bo bavuga ko iyi raporo itagaragaza neza uburyo u Bwongereza bushobora gukomeza gutera imbere binyuze muri WTO, ko ahubwo igamije gutera abantu ubwoba.

Inyigo ku bijyanye no koroshya ubucuruzi mu gihe cya Brexit yakozwe n’itsinda ry’abahanga mu by’ubukungu mu kwezi gushize, yagaragaje ko u Bwongereza nibukuraho imisoro ku byinjira, umusaruro mbumbe w’imbere mu gihugu ushobora kwiyongeraho 4%, impapuro mpeshwamwenda zishyirwa ku isoko zikiyongera kugera kuri 7.3%.

Minisitiri w’Intebe w'u Bwongereza, Theresa May ngo kuba yishingikirije Umuryango Mpuzamahanga w’Ubucuruzi (WTO), igihe Brexit yaba itagenze neza bishobora kugira ingaruka mbi ku bukungu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza