U Bwongereza bwafatiriye imitungo y’Abanye-Congo ingana na miliyoni 808 z’amadolari

Yanditswe na Mukaneza M.Ange
Kuya 14 Gashyantare 2018 saa 07:16
Yasuwe :
0 0

Guverinoma y’u Bwongereza yatangaje ko mu myaka isaga 10 ishize, imaze gufatira imitungo ifite agaciro ka miliyoni 808 z’amadolari y’abakekwaho kugira uruhare mu mvururu zikomeje kugaragara muri Repubulika Iharanira Demokarasi ya Congo ( RDC).

Iyi mitungo yafatiriwe hubahirizwa ishyirwa mu bikorwa ry’ibihano Umuryango w’Ubumwe bw’u Burayi ndetse n’Umuryango w’Abibumbye, byagiye bifatira abayobozi muri Leta, abasirikare, ab’imitwe yitwaje intwaro ndetse n’ibigo byigenga bifitanye isano n’imvururu n’imirwano biri muri RDC.

Iyi mibare yashyizwe ku rubuga rw’Inteko Ishinga Amategeko y’u Bwongereza n’Umunyabanga wa Leta ushinzwe imari, John Glen, ubwo yasubizaga umudepite wari wamubajije amakuru ku bihano byafatiwe RDC.

Glen yavuze ko amakuru yatanzwe arebana n’imitungo yafatiriwe kuva mu 2005 kugera ku wa 30 Nzeri 2016. Ikaba yarabaruwe mbere y’uko mu mpera za 2016 na 2017, EU yongera gufatira ibihano abayobozi 15 bakora mu nzego za leta n’umwe uyobora umutwe witwaje intwaro.

Nk’uko yakomeje abivuga, imitungo yafatiriwe ikomeza kuba mu maboko ya beneyo n’ibigo hakurikijwe ibiteganywa n’amategeko.

Imitungo yafatiriwe itangazwa agaciro muri rusange mu kwirinda ko hamenyekana ibyo umuntu ku giti cye atunze.

RDC yafatiwe ibihano birimo no kubuzwa kugura intwaro bwa mbere mu 2003 n’Umuryango w’Abibumbye, nyuma y’intambara yari imaze imyaka itanu mu Burasirazuba bw’iki gihugu, ahaguye ababarirwa muri miliyoni, benshi bazize indwara z’ibyorezo n’inzara.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza