U Bwongereza bwatangiye ibiganiro na EU byo kwivana mu muryango ku mugaragaro

Yanditswe na Rabbi Malo Umucunguzi
Kuya 19 Kamena 2017 saa 12:34
Yasuwe :
0 0

Ibiganiro byo gukura ubwami bw’u Bwongereza mu Muryango w’Ubumwe bw’ibihugu by’i Burayi, EU, byatangiye ku mugaragaro kuri uyu wa Mbere i Bruxelles mu Bubiligi, ku cyicaro gikuru cy’uwo muryango.

Minisitiri ushinzwe iyo gahunda izwi nka Brexit, David Davis, yavuze ko azasaba “amasezerano adafite andi bisa mu mateka”.

Ibiganiro by’intangiriro hagati ya David Davis n’umuyobozi uhagarariye EU, Michel Barnier bizibanda ku ngingo zirimo abakozi b’abanyamahanga hagati ya EU n’u Bwongereza, icyo u Bwongereza buzishyura EU n’ikibazo cy’umupaka wa Ireland ya Ruguru itarashyigikiye Brexit.

Nk’uko BBC yabitangaje, Davis yavuze ko hakiri “urugendo rurerure” ariko anizeza ko hari “ubufatanye busesuye kandi budasanzwe.”

Uruhande rw’u Bwongereza ruvuga ko rukeneye ko nyuma yo gutandukana na EU, impande zombi zikomeza kuba ibihugu bikomeye, ariko EU ikavuga ko nibumara kwivanamo buzatakomeza gufatwa nk’ibindi bihugu bisigayemo.

Uru ni urugendo ruri gukorwa nyuma ya kamarampaka yabaye kuwa 23 Kamena 2016, abaturage bagize Ubwami bw’u Bwongereza bwagutse 51.9% batora kuva muri EU, na ho 48.1% bagashyigikira kugumamo.

Mu Bwongereza nk’igihugu (England) batoye kuvamo ari 53.4%, muri Wales batora kuvamo ari 52.5%, nyamara muri Ecosse bo bashyigikiye kuguma muri EU kuri 62% ndetse na Ireland ya Ruguru bashyigikira kugumana na EU kuri 55.8%.

Ingingo ya 50 y’masezerano ya EU igena ko igihugu gishaka kuva muri uwo muryango gihabwa imyaka ibiri yo kubyitegura binyuze mu biganiro.

Kubera ko Minisitiri w’Intebe w’u Bwongereza Theresa May yatangaje ukujya mu bikorwa kw’iyo ngingo kuwa 29 Werurwe, byitezwe ko urugendo rwo kuvana u Bwongereza muri EU rugomba gusozwa bitarenze kuwa Gatanu tariki 29 Werurwe 2019.

Umuyobozi uhagarariye EU, Michel Barnier na David Davis ushinzwe ubunyamabanga bwa gahunda ya Brexit

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza