U Bwongereza: Minisitiri yeguye azira kugirana ibiganiro rwihishwa na Israel

Yanditswe na Evariste Nsengimana
Kuya 9 Ugushyingo 2017 saa 11:49
Yasuwe :
0 0

Priti Patel wari Minisitiri ushinzwe gukurikirana inkunga hagati y’u Bwongereza n’amahanga, yeguye ku mirimo ye nyuma y’uko bigaragaye ko yagiranye ibiganiro rwihishwa n’abayobozi ba Israel harimo na Minisitiri w’Intebe wa Israel, Benjamin Netanyahu.

Minisitiri w’Intebe w’u Bongereza, Theresa May, yahamagaje Patel ubwo yari mu ruzinduko muri Afurika, ngo asobanure ku muhuro w’ibanga yagiranye n’abanyapolitiki n’abanyobozi ba Israel, ugamije kugenera inkunga igisirikare cyayo.

Kuwa Mbere nibwo Patel yasabye imbabazi ku nshuro 12 zitandukanye yagiye agirana inama rwihishwa n’abayobozi barimo Minisitiri w’Intebe, Netanyahu muri Kanama, ubwo yari mu kiruhuko muri Israel, akabikora atamenyesheje ibiro bishinwe ububanyi n’amahanga.

Patel yatangaje ubwegure bwe kuri uyu wa Gatatu, aba uwa Kabiri mu bagize Guverinoma y’u Bwongereza weguye mu gihe kitarenze icyumweru, nyuma y’umunyamabanga w’Igisirikare cy’u Bwongereza, Michael Fallon, weguye ashinjwa ibifitanye isano n’ihohoterwa rishingiye ku gitsina, ibintu byababaje Theresa May.

Amwe mu magambo yari akubiye mu ibaruwa Patel yandikiye Theresa May yegura, nkuko byatangajwe n’ibiro ntaramakuru by’Abafaransa, yagiraga ati " Ndasaba imbabazi mbikuye ku mutima wowe (Theresa May) na Guverinoma, ku byabaye nanatangaza ubwegure bwanjye.”

Minisiri w’Intebe May yemeye ubwegure bwe, amusubiza agira ati "U Bwongereza na Israel ni inshuti zikomeye ndetse mu kuri tugomba kugirana ibiganiro bya hafi, ariko bigomba gukorwa mu buryo buzwi."

Kuri ubu, u Bwongereza buri mu bihe bikomeye byo kwitegura kuva mu Muryango w’Ubumwe bw’u Burayi, EU, ari nako Minisitiri w’Intebe ahanganye no gushyira ku murongo abagize guverinoma basa n’abacitsemo ibice nyuma y’amatora yo muri Kamena.

Minisitiri Priti Patel weguye ku mirimo ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza