Umu-cardinal ukomeye muri Kiliziya aratangira kuburanishwa ku byaha by’ihohoterwa rishingiye ku gitsina

Yanditswe na Mukaneza M.Ange
Kuya 5 Werurwe 2018 saa 08:47
Yasuwe :
0 1

Mu gihe cy’ukwezi kose, Urukiko rwo muri Australia mu Mujyi wa Melbourne rugiye gutangira kumva ubuhamya bw’abashinja cardinal George Pell wahoze ari Umuyobozi ushinzwe Ubukungu i Vatican, kubakorera ihohoterwa rishingiye ku gitsina.

Pell ashinjwa gufata abana b’abahungu ku ngufu ubwo yari Umuyobozi wa Paruwasi ya Sydney mu 2002; ibikorwa ariko we ahakana yivuye inyuma. Muri Kamena umwaka ushize yavuye ku mwanya yariho i Vatican kugira ngo akurikirane iby’iki kirego kigomba kuburanirishirizwa muri Australia.

Kuri uyu wa Mbere nibwo yageze mu Rukiko rwa Melbourne aherekejwe n’abapolisi benshi bamufasha kwirinda abanyamakuru bashakaga kumuhata ibibazo. Ategetswe kwitaba buri munsi mu byumweru bine byose uru rubanza ruzamara.

Nk’uko CNN dukesha iyi nkuru yabyanditse, ni ubwa mbere umuntu ukomeye cyane i Roma agiye gutangira gukurikiranwa n’urukiko.

Ibishinjwa Pell byatangiye kuvugwa mu 2013, ubwo hashyirwagaho itsinda ridasanzwe ry’abapolisi bari bahawe inshingano zo gucukumbura ibijyanye n’ihohoterwa rishingiye ku gitsina rishinjwa abapadiri ndetse n’abakozi b’imiryango ishamikiiye kuri Kiliziya Gatolika.

Mu byumweru bibiri bya mbere, urukiko rurateganya kumva mu muhezo ubuhamya bw’abashinja Pell kubahohotera, ibindi bisigaye ruzatega amatwi abandi batangabuhamya bagera kuri 40 ariko batari mu bafashwe ku ngufu.

Abahanga mu bijyanye n’amategeko ariko bavuga ko nta cyizere ko uru rubanza ruzaba mu mucyo, igihe cyose ibimenyetso bishinja Pell bizaba bitangiwe mu muhezo.

Batewe impungenge kandi n’uko abatangabuhamya bashobora guterwa ubwoba no guhatwa ibibazo n’abunganira Pell w’imyaka 76, bayobowe na Robert Richter uzwiho gukoresha uburyo budasanzwe akabona amakuru ashatse.

Umucamanza Belinda Wallington ariko yatangaje ko nta mpungenge kuko mu gihe cyo gutanga ubuhamya, bafite uburenganzira bwo kuba bari kumwe n’inshuti cyangwa abo mu miryango yabo, byaba na ngombwa hakitabazwa imbwa zatojwe kuba hafi abatangabuhamya bafite ihungabana kugira babashe gutanga ibimenyetso.

Biteganyijwe ko nyuma yo kumva ubuhamya, abacamanza bazafata umwanzuro wemeza ko hari ibimenyetso bihagije byatuma urubanza rukomereza mu rukiko rwisumbuyeho.

Umwaka ushize ubwo yitabaga urukiko bwa mbere, Pell yari arinzwe bikomeye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza