Umurinzi yari arashe Umwamikazi w’u Bwongereza amwitiranyije n’umugizi wa nabi

Yanditswe na Evariste Nsengimana
Kuya 5 Mutarama 2017 saa 10:20
Yasuwe : XX
0

Umwe mu barinzi b’i Bwami yari agiye kurasa Umwamikazi w’u Bwongereza, Elizabeth II mu masaha y’igicuku yikanze ko ari umugizi wa nabi.

Byatangajwe ko mu minsi ishize ahagana saa cyenda z’igicuku, Umwamikazi yabuze ibitotsi arasohoka ajya gufata akayaga hanze mu busitani buherereye mu Ngoro ye iri Buckingham mu Mujyi wa Londres, umurinzi amwikanze ashaka kumurasa.

Uwo murinzi yaje gushishoza neza abona ko ari Umwamikazi maze agira ati “Nari ngiye kumena amaraso y’Umwamikazi. Nari nkurashe habura gato.”

Nyuma y’ibyo, Umwamikazi yatangaje ko ubutaha azajya abanza akabateguza mbere yo gusohoka. Ati “ Ibyo wari ukoze nibyo ariko ikindi gihe nzajya mbanza mvuze inzogera mbamenyeshe mutazandasa.”

Ikinyamakuru The Times gitangaza ko Umwamikazi w’u Bwongereza w’imyaka 90 akunda gutembera cyane mu masaha y’ijoro yambaye ikoti rinini ry’imbeho by’umwihariko iyo yabuze ibitotsi.

Ibi bitangajwe mu gihe hari hashize iminsi Umwamikazi w’u Bwongereza atagaragara mu ruhame kubera uburwayi yagize bwaturutse ku bukonje. Ubu nibwo bwatumye atitabira igitambo cya misa ya Noheli.

Ibikorwa byo kwikanga umugizi wa nabi i Bwami si ubwa mbere bigaragaye ku butaka bw’u Bwongereza kuko mu 2013 Polisi yataye muri yombi Igikomangoma Andrew yibeshye ko ari umugizi wa nabi ubwo yari ari gutembera mu busitani bwa Buckingham, i Bwami, yaje gusanga nta ntwaro yari afite ndetse imusaba imbabazi.

Umwamikazi Elisabeth yari agiye kuraswa n'umurinzi we
Igikomangoma Andrew nawe yafashwe na Polisi imwitiranyije n'umugizi wa nabi
Ubusitani bw'Ingoro ya Buckingham, Umwamikazi Elisabeth II akunda gutemberamo mu masaha y'ijoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza