Umwaka wa Mbere wa Donald Trump: Ubukungu bwa USA bwazamutse

Yanditswe na Herve Ugirumukunda
Kuya 8 Ugushyingo 2017 saa 09:17
Yasuwe :
1 0

Ubushakashatsi bwerekanye ko mu mwaka umwe ushize Donald Trump abaye Perezida wa Leta Zunze Ubumwe za Amerika, ubukungu bwazamutse abaturage benshi bakabona imirimo.

Ikigo Moody’s kivuga ko kuva Trump yajya ku butegetsi hahanzwe imirimo miliyoni 1.8 ndetse isoko ry’imari n’imigabane rikazamukaho 22%, mu kuzamura ubukungu, ubuyobozi bw’uyu mugabo utavugwaho rumwe ahabwa inota ryiza rya A-.

Muri Gicurasi, Trump yahabwaga inota rya B ariko abashomeri benshi bakomeza guhabwa akazi cyane cyane mu nganda, aza kuri B+ muri za Nyakanga na A- muri Nzeli.

Abashomeri babaye nk’abiyongera muri Nzeli kubera inkubi z’umuyaga zibasiye Texas na Florida ariko imirimo iba myinshi mu Ukwakira.

Hagendewe ku ngingo esheshatu zigaragaza ubukungu, ugereranyije Donald Trump n’abaperezida batandatu bamubanjirije usanga imirimo yariyongereye cyane urebeye ku myaka ya mbere ya Perezida Jimmy Carter mu 1977 na Bill Clinton mu 1993.

Isoko ry’imari n’imigabane riteye neza nko mu myaka ya mbere ya Barack Obama na George H. W Bush. Yahoo Finance ivuga ko nta muperezida wayoboye USA mu mwaka we wa mbere urusha Trump kuzamura amafaranga umuturage akorera ku isaha; ku byoherezwa mu mahanga no kuzamura ubukungu muri rusange ni umwe gusa umurusha.

Ubwiyongere bw’imirimo ku buyobozi bwa Trump bwisumbuyeho gake ugereranyije no mu myaka ibiri ya nyuma y’ubuyobozi bwa Obama.

Abahanga mu by’ubukungu bemeza ko impinduka Trump ashaka zizagira ingaruka nziza n’imbi ku bukungu bwa USA. Nka politiki yo kugabanya imisoro we n’ishyaka rye ry’aba-républicain bashyigikiye ivugwaho kuzazamura inyungu z’ibigo by’ubucuruzi no kongera agaciro k’imigabane.

Hari kandi n’amananiza mu igenzura yavanyeho azaruhura abacuruzi, ndetse ashaka gusubiramo amasezerano y’ubuhahirane bw’ibihugu bya Amerika ya Ruguru, NAFTA.

Akijya ku buyobozi, Donald Trump yavuze ko azavana USA muri ayo masezerano Canada na Mexico nibidakora amavugurura atuma igihugu cye cyunguka.

Byitezwe ko ubuyobozi bwa Trump buzahindura bifatika ubukungu bwa USA hagati muri 2018 kuko ari bwo bizamenyekana neza niba gahunda ze zizashyirwa mu bikorwa.

Icyegeranyo cya Yahoo Finance ku izamuka ry'ubukungu ku buyobozi bwa Trump
Mood's na Yahoo Finance byemeza ko ubukungu bwa USA buzamuka
Donald Trump ari gushimirwa Politiki ifasha abanyamerika kubona akazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza